Aqparat jáne kommýnikatsiialar ministri Dáýren Abaev búgin túnde Astanada órtten qaza bolǵan bes balanyń ata-anasyna kóńil aitty, dep habarlaidy "Ult aqparat".
Ortalyq kommýnikatsiialar qyzmetinde "QAZAQ EPOS" respýblikalyq aǵartý jobasy boiynsha bastalǵan brifingti aqparat jáne kommýnikatsiialar ministri kóńil aitýdan bastady.
"Búgin túnde Astanadaǵy jekemenshik úilerdiń birinde bolǵan órtten qaza tapqan bes balanyń ata-anasy men týǵan-týystaryna kóńil aitamyn. Órt shyqqan kezde, kishkentailardyń ata-anasy jumysta bolypty. Órttiń shyǵý sebepterin quzyrly organdar óte muqiiat tekserip, naqty aqparat beredi dep senemiz. Óte qaiǵyly jaǵdai, balalarymyzǵa, olardyń ómirine saq bolaiyq", - dedi Abaev brifingti bastamas buryn.
Ol Astana ákimdigi jerleý rásimin uiymdastyrý sharalar óz moinyna alǵanyn atap ótti.
"Ata-analarǵa psihologtar kómek kórsetýde. Ákimdik barlyq qajetti jumysty júrgizip jatyr", - dedi ministr.
Jýrnalister áleýmettik jelilerde halyq qaiǵyly jaǵdaiǵa bailanysty qaraly kún jariialaýdy usynǵanyn aitty.
"Qaraly kún jariialaý boiynsha óziniń kriteriileri bar. Eger sol kriteriiler bolsa, ony arnaiy komissiia sheshedi. Bul bizdiń qolymyzda emes", - dep qysqa qaiyrdy ministr.
Eske sala keteiik, 4 aqpan kúni túninde elordanyń Saryarqa aýdanyndaǵy Kóktal-1 turǵyn alabynda órt shyqty. Órtti sóndirý barysynda 2006, 2008, 2014, 2016, 2018 jyly dúniege kelgen 5 balanyń denesi tabyldy. Eń kishisi nebári úsh ailyq sábi edi.
Sonymen qatar, búgin Astana ákimi Baqyt Sultanov bes balanyń órtten kóz jumýynyń sebep-saldaryn anyqtaýdy talap etti.
Órt saldarynan zardap shekken bul otbasy baspana kezeginde turmaǵan.
