90-jyldary el arasynda keńinen tanylǵan “Saǵynysh sazy” ániniń avtorlyǵyna qatysty daý týdy. Sazger Birjan Asqarov kópshilikke belgili týyndyny ózi jazǵanyn málimdep, ándi oryndap tanylǵan Talǵat Jorabaevqa renishin bildirdi, dep habarlaidy ult.kz.

“Meniń ómirim” baǵdarlamasynda sazger Birjan Asqarov osydan 36 jyl buryn dúniege kelgen ánniń shyǵý tarihyn baiandady. Onyń aitýynsha, “Saǵynysh sazynyń” sózi men áýenin 15 jasynda jazǵan. Alaida týyndyǵa qatysty avtorlyq quqyǵyn tek byltyr ǵana rásimdegen.

Sazgerdiń sózinshe, án 1990 jyly qazirgi Túrkistan oblysynyń Otyrar aýdanynda oqyp júrgen kezinde dúniege kelgen.

“Bul ándi jazǵanyma 36 jylǵa ketip bara jatyr. Qazirgi Túrkistan oblysy Otyrar aýdanynda ýchilishede birinshi kýrsqa barǵan kezimde jazǵanmyn. Habibi Jienov degen jigit ekeýimiz bir án jazaiyq dep. Bul ánniń aldynda da bir án jazǵam”, – deidi Birjan Asqarov.

Ol kópshiliktiń júreginen oryn alǵan týyndynyń jazylýyna jasóspirim kezdegi jaýapsyz mahabbaty sebep bolǵanyn jetkizdi.

“Bul án Gúljazira degen qyzǵa arnalǵan án edi. Ózimmen kýrstas, býhgalterlik bólimde oqyǵan qyz. Al Habibi deitin jigit te bir qyzǵa ǵashyq boldy, ánniń ekinshi kýpletin sol jazǵan. “Saǵynysh sazy” bolyp, halyqtyń aýzynda solai atalyp ketti. Sodan qulaqtan-qulaqqa, aýyzdan-aýyzǵa tarap, bul án osylai ketti”, – dep eske aldy sazger.

Birjan Asqarovtyń aitýynsha, ol kezde ándi kásibi oryndaýshylarǵa arnaiy usynbaǵan. Týyndyny ózi aýyl arasynda, túrli basqosýlarda oryndap júrgen. Keiin án el ishinde keńinen taralyp, kópshiliktiń súiikti shyǵarmalarynyń birine ainalǵan.

Ýaqyt óte kele “Saǵynysh sazy” ánshi Talǵat Jorabaevtyń oryndaýynda úlken sahnalarda shyrqaldy. Alaida arada jyldar ótken soń Birjan Asqarov týyndynyń avtory ekenin ashyq aityp, ánshige ókpesi baryn jetkizdi.

Aita keteiik, Altynai Jorabaeva qyzynyń toiyn dúrkiretip ótkizdi.

Talǵat Jorabaev kim?

Talǵat Jorabaev – qazaqstandyq estrada ánshisi, tanymal óner iesi Altynai Jorabaevanyń týǵan inisi. Ol kópshilikke lirikalyq jáne toi-estrada baǵytyndaǵy ánderimen tanylǵan. Ásirese “Saǵynysh sazy”, “Týǵan el”, “Saǵyndym seni” shyǵarmalary arqyly tyńdarman yqylasyna bólengen.

Ánshi shyǵarmashylyq jolynda jeke ánder jazdyryp, beinebaiandar túsirgen. Sonymen qatar akterlik qyrynan da tanylyp, “Hantalapai” filmine túsken. Óner iesi suhbattarynda qarapaiym otbasynda tárbielengenin, úidiń kenjesi bolǵanyn jáne bala kezinen eńbekke aralasqanyn aitqan.