KNUS ýniversitetiniń quryltaishysy Nurasyl Medeý ózi týraly taraǵan qaýesetterge jaýap berip, oqý ornynyń ǵimaraty kimge tiesili ekenin, tabystyń qalai bólinetinin jáne stýdentterge qandai granttar beriletinin túsindirdi, dep habarlaidy ult.kz.
Nurasyl Medeý Prezidenttiń týysy bolýyn úlken jaýapkershilik dep sanaidy. Onyń aitýynsha, bul jaǵdaidy ózi tańdamaǵanymen, alǵan múmkindikterin el men halyqtyń igiligine jumsaýǵa umtylady.
«Eń aldymen, osy otbasynda dúniege kelgenim úshin Jaratqanǵa rizamyn. Qan sý emes qoi. Árine, bul tańdaýdy ózim jasaǵan joqpyn. Degenmen, osyndai múmkindikterge ie bolǵanyma, jańa dúnieler jasaýǵa múmkindik týǵanyna rizamyn», – dedi ol.
Onyń sózinshe, Baýyrjan Momyshuly aitqandai, jiyrma jas – erlik jasap, jańa dúnieler quryp, alǵa umtylatyn kezeń. Sondyqtan ol ózine júktelgen jaýapkershilikti sezinip, Qazaqstan men halyq úshin paidaly ister atqarýdy maqsat etedi.
Nurasyl Medeý arǵy atasynyń qazaq ádebietindegi ómirbaiandyq janrdyń negizin qalaýshylardyń biri ekenin atap ótti. Onyń pikirinshe, bul murany jalǵastyrý jáne qalyptasqan deńgeiden tómendemei, elge qajetti jańa jobalar jasaý mańyzdy.
«Ýniversitetti óz kúshimizben ashtyq»
KNUS ýniversitetiniń qurylýy týraly sóz qozǵaǵan Nurasyl Medeý jobany júzege asyrýda kásibi mamandardan quralǵan komandaǵa súiengenin aitty.
Onyń sózinshe, 2021 jylǵa deiin ýniversitet ideiasyn qoldaǵan, sport salasyndaǵy olqylyqtardy kórip, olardy túzetýge úles qosqysy kelgen mamandar jinalǵan. Al oqý ornynyń alǵashqy jylynda 150 stýdent bilim alǵan.
«Jańa ýniversitetke senim artý kez kelgenniń qolynan kele bermeidi. Onyń qandai oqý orny bolatynyn, bolashaǵynyń qalai qalyptasatynyn eshkim bilmedi. Soǵan qaramastan, olar bizdiń ideiamyzǵa senip, bizge qosyldy. Sóitip, osy jobany birge damyttyq», – dedi ol.
Sondai-aq Nurasyl Medeý ýniversitetti ashýda airyqsha artyqshylyqtarǵa súiendi degen pikirmen kelispeitinin jetkizdi. Onyń aitýynsha, jobany júzege asyrý úshin komanda jinap, jumysty óz kúshterimen atqarýǵa týra kelgen.
Ýniversitet ǵimaraty kimge tiesili?
Suhbat barysynda Nurasyl Medeý ýniversitet ǵimaratynyń ózine tiesili ekeni týraly aqparattarǵa da toqtaldy. Ol ýniversitettiń rektory emes, quryltaishysy bolǵanyn atap ótti.
«Jurt arasynda “Mundai jas adam osynshama dúniege qalai ielik ete alady?” degen áńgimeler aitylady. Men áý bastan ýniversitettiń rektory emes, quryltaishysy boldym. Sondyqtan bul úderiste basynan bastap birge jumys istegen kásibi mamandardan quralǵan komandaǵa súiendim», – dedi ol.
Nurasyl Medeýdiń aitýynsha, ýniversitet ornalasqan ǵimarat memleket menshiginde. Ol ǵimaratty óz menshigindegi nysan retinde basqaǵa sata almaitynyn aityp, bul máselege qatysty aqparattyń ashyq ekenin jetkizdi.
Onyń málimdeýinshe, ǵimaratty paidalanýdan, sonyń ishinde jalǵa berýden túsetin kiristiń 60 paiyzy memleketke aýdarylady. Al qalǵan paida bilim berý úderisine, sonyń ishinde stýdentterge arnalǵan granttardy qarjylandyrýǵa baǵyttalady.
Aýyl jastaryna arnalǵan granttar
Nurasyl Medeý ýniversitette Life Chance Grant jáne Life Merit Grant baǵdarlamalary bar ekenin aitty. Onyń sózinshe, Life Chance Grant – ózi qarjylandyratyn jeke grant. Ol stýdenttiń oqý aqysyn tolyq ótep, turýyna, jol shyǵyndaryna jáne akademiialyq utqyrlyqqa bailanysty saparlaryna qarajat bóledi.
Granttyń basty ereksheligi – aýyldyq jerler men óńirlerden shyqqan jastarǵa múmkindik berý. Baǵdarlama boiynsha Astana men Almaty siiaqty iri qalalardan tys jerlerde turatyn jastar úmitker bola alady.
Nurasyl Medeýdiń aitýynsha, grant iegerleri birneshe talap boiynsha irikteledi. Úmitker aýyldyq jerde turýy, belgili bir sporttyq jetistikterge ie bolýy jáne suhbat kezeńderinen ótýi kerek.
Ol stýdentterdi iriktegende tek oqý úlgerimine emes, olardyń talpynysyna, maqsatyna jáne ózin kórsetýge degen yntasyna da mán beriletinin atap ótti.
«Biz úmitkerlerdi tek baǵalaryna qarap baǵalamaimyz. Kerisinshe, olardyń talpynysyna, ózderin kórsetýge degen yntasyna, maqsatqa jetý jolyndaǵy áreketterine jáne boiyndaǵy qabiletine kóbirek mán beremiz. Bizdiń maqsatymyz – shynymen de talantty, alǵa umtylatyn jastardy qoldaý», – dedi KNUS quryltaishysy.
