Qazaqstanda ekinshi býyndaǵy jańa Li Auto L9 resmi túrde tanystyryldy. Qytailyq premiým krossoverdiń eksporttyq nusqasy elimizdegi dilerlik ortalyqtarǵa jetkizildi. Avtomobildiń Qazaqstandaǵy baǵasy komplektatsiiasyna qarai 44 mln teńgeden 51,9 mln teńgege deiin jetedi, dep habarlaidy ult.kz.
Kolesa.kz jazýynsha, jańa model alǵash ret kóktemde Beijiń halyqaralyq avtosalonynda kórsetilgen. Al jaz ortasynda Li Auto L9 Qazaqstanǵa keldi. Bul – qytailyq brend tarihyndaǵy alǵashqy sheteldik premeralardyń biri.
Qazaqstanǵa eksporttyq Li Auto L9 ákelindi
Qazaqstan naryǵyna jetkizilgen Li Auto L9 Qytaidyń ishki naryǵyna arnalǵan nusqadan erekshelenedi. Krossover Eýropa standartyna sáikes keletin CCS2 qýattaý portymen jabdyqtalǵan.
Eksporttyq model ieleri arnaiy master-akkaýnt ashyp, Li Auto mobildi qosymshasynyń barlyq múmkindigin paidalana alady. Qosymsha arqyly kóliktiń keibir fýnktsiiasyn qashyqtan basqarýǵa múmkindik beriledi.
Sonymen qatar Li Auto L9 Qazaqstanda zaýyttan "Iandeks" servisteri ornatylǵan alǵashqy avtomobilderdiń biri bolmaq. Júrgizýshilerge janarmai beketteri kórsetiletin navigatsiia, mýzyka, beinekontent jáne "Kinopoisk" servisi qoljetimdi bolady.
Krossoverdiń mýltimediialyq júiesi internet arqyly symsyz jańartylady.
Jańa Li Auto L9 kólemi ulǵaidy
Ekinshi býyndaǵy Li Auto L9 burynǵy modelden irilene túsken. Kóliktiń uzyndyǵy 37 millimetrge artyp, 5255 millimetrge jetti.
Dóńgelek bazasy 20 millimetrge uzaryp, 3125 millimetr boldy. Sonymen qatar avtomobildiń eni 2 millimetrge, biiktigi 10 millimetrge artqan.
Jańa L9 alty adamǵa arnalǵan keń salonmen jabdyqtalǵan. Aldyńǵy panelde 29 diýimdik ekran ornalasqan. Buryn ról ústinde bolǵan shaǵyn aspaptar paneli alynyp tastalyp, negizgi aqparat proektsiialyq displei arqyly kórsetiledi.
Esik kartasyndaǵy dástúrli tutqanyń ornyn batyrma basqan. Qosymsha optsiia retinde esikti elektr jetegi arqyly ashýǵa bolady.
Li Auto L9 salonynda qandai múmkindikter bar?
Jańa Li Auto L9-dyń bazalyq jabdyqtalýynyń ózi joǵary deńgeidegi jailylyqty usynady.
Birinshi jáne ekinshi qatardaǵy oryndyqtarda:
- jylytý;
- jeldetý;
- massaj fýnktsiiasy qarastyrylǵan.
Avtomobilde júrgizýshi men jolaýshylarǵa arnalǵan jeti aimaqty klimat-baqylaý júiesi bar. Ol aiaq pen denege baǵyttalatyn aýa temperatýrasyn bólek retteýge múmkindik beredi.
Sondai-aq krossoverge esik kartasy men shyntaq tireýishterin jylytý, panoramaly shatyr men artqy áinekterdi kúńgirtteitin elektrofotohromdy júie ornatylǵan.
Salonda belsendi shý basý júiesi, 33 dinamikten turatyn aýdiojúie jáne artqy qatardaǵy jolaýshylarǵa arnalǵan 21,1 diýimdik ekran bar.
Li Auto L9 qozǵaltqyshynyń qýaty qandai?
Li Auto L9 – tizbekti gibrid. Kóliktegi 1,5 litrlik benzin qozǵaltqyshy dóńgelekterdi tikelei ainaldyrmaidy, ol elektr energiiasyn óndiretin generator retinde jumys isteidi.
Krossover eki elektr qozǵaltqyshymen jabdyqtalǵan. Kúshtik qondyrǵynyń jalpy qýaty 571 at kúshine, al ainalý momenti 710 Nm-ge teń.
Avtomobilge syiymdylyǵy 72,7 kVt·saǵ bolatyn NMC akkýmýliatory ornatylǵan.
Li Auto L9 tek elektr qýatymen:
- CLTC tsikli boiynsha 420 shaqyrym;
- WLTC standarty boiynsha 340 shaqyrym júre alady.
- Al eksporttyq nusqanyń tolyq júris qory 1370 shaqyrymǵa deiin jetedi.
Jańa krossoverdiń aspasy jańartyldy
Li Auto L9-dyń aldyńǵy bóligi qos kóldeneń iintirekti aspamen, al artqy bóligi kóp iintirekti aspamen jabdyqtalǵan. Krossoverde eki kameraly pnevmatikalyq ballondar jáne 800 volttyq júieden qýat alatyn gidravlikalyq tirekter qoldanylady.
Bul tehnologiia ár dóńgelektiń jeke jumys isteýine múmkindik berip, burylysta jáne nashar jolda shanaqtyń shaiqalýyn azaitady.
Avtomobildiń artqy dóńgelekteri 7 gradýsqa deiin buryla alady. Sonyń arqasynda iri krossoverdiń burylý radiýsy 5,3 metrge deiin qysqarǵan. Ról men dóńgelekter arasynda dástúrli mehanikalyq bailanys joq. Júrgizýshi róldiń ainalym sanyn elektrondy túrde rettei alady.
Li Auto L9 Qazaqstanda qansha turady?
Qazaqstandaǵy resmi avtosalondarda jańa Li Auto L9 eki komplektatsiiada usynylady:
- Li Auto L9 Ultra – 44 mln teńgeden bastalady;
- Li Auto L9 Livis – 51,9 mln teńgeden bastalady.
Livis nusqasynyń shanaǵy eki túske boialady jáne jabdyqtalý deńgeii joǵary.
15 qyrkúiekke deiin aldyn ala tapsyrys bergen alǵashqy satyp alýshylarǵa 1 mln teńge jeńildik usynylady.
Jańa Li Auto L9 Qazaqstandaǵy avtosalondarǵa tamyz aiynda jetkiziledi. Salystyrý úshin, aldyńǵy býyndaǵy Li Auto L9 elimizde shamamen 41,1 mln teńge turady.
