29 shilde – Halyqaralyq jolbarystar kúni. Osyǵan orai Ekologiia jáne tabiǵi resýrstar ministrligi Qazaqstanda Turan jolbarysyn tarihi mekenine qaita jersindirý jobasynyń júzege asyrylyp jatqanyn eske saldy, dep habarlaidy ult.kz.
Ministrliktiń málimetinshe, bir kezderi qazaq dalasyn mekendegen Turan jolbarysy adam áreketiniń saldarynan tabiǵattan joiylyp ketken. Qazir elimiz bul jyrtqyshty tarihi mekenine qaita qaitarýǵa baǵyttalǵan aýqymdy ekologiialyq jobany júzege asyrýda. Jobanyń maqsaty – sirek janýardy ǵana emes, tutas ekojúieniń tabiǵi tepe-teńdigin qalpyna keltirý.
Bul bastamada «Ile-Balqash» memlekettik tabiǵi rezervaty negizgi ról atqarady. Munda jolbarystyń tirshiligine qolaily orta qalyptastyrylyp, qorek bazasyn nyǵaitý jáne bioalýantúrlilikti saqtaý baǵytynda keshendi jumystar júrgizilýde.
Joba aiasynda 2024 jyly Niderlandtan, al 2026 jyly Resei Federatsiiasynan Amýr jolbarystary jetkizildi. Qazirgi ýaqytta rezervattaǵy arnaiy voler kesheninde alty jolbarys jańa ortaǵa beiimdelý kezeńinen ótip jatyr. Bul Turan jolbarysyn tarihi mekenine qaita jersindirý jolyndaǵy mańyzdy kezeńderdiń biri sanalady.
Ekologiia ministrligi jolbarystyń tabiǵattaǵy orny erekshe ekenin atap ótti. Vedomstvonyń málimetinshe, bul jyrtqysh ekojúieniń saýlyǵy men tabiǵi tepe-teńdiktiń mańyzdy kórsetkishi bolyp tabylady.
Ministrlik tabiǵatty qorǵaý ár azamattyń ortaq jaýapkershiligi ekenin aityp, jabaiy tabiǵatty saqtaýǵa baǵyttalǵan jumystardyń bolashaq urpaq úshin mańyzdy ekenin jetkizdi.
