Túrkistan oblysynyń Otyrar aýdanynda erekshe qajettilikteri bar 96 balaǵa úsh jyl boiy áleýmettik kómek tolyq kólemde berilmegen. Prokýratýra tekserisinen keiin balalarǵa tiesili 9 million teńgege jýyq bereshek tolyǵymen óteldi, dep habarlaidy ult.kz.
Otyrar aýdandyq prokýratýrasy aýdan ákimdiginiń jumyspen qamtý jáne áleýmettik baǵdarlamalar bóliminiń qyzmetine taldaý júrgizý barysynda zań buzýshylyqty anyqtaǵan.
Máslihat sheshimine sáikes, I, II jáne III toptaǵy 7-18 jas aralyǵyndaǵy múgedektigi bar balalarǵa ai saiyn 4 ailyq eseptik kórsetkish (AEK) mólsherinde áleýmettik kómek tólenýi kerek.
Alaida 2023-2025 jyldar aralyǵynda 96 balaǵa belgilengen 4 AEK ornyna nebári 3 AEK kóleminde qarajat aýdarylǵan. Saldarynan balalarǵa tiesili áleýmettik tólemder tolyq berilmei, olardyń zańmen kepildik berilgen quqyqtary buzylǵan.
Prokýratýranyń qadaǵalaý aktisinen keiin zań buzýshylyq joiylyp, 96 balanyń áleýmettik quqyqtary qalpyna keltirildi. Tólenbei qalǵan 9 million teńgege jýyq qarajat tolyq kólemde óteldi.
