Qazaqstanda 2027 jylǵy 1 qańtardan bastap jumysynan aiyrylǵan azamattarǵa áleýmettik tólem taǵaiyndaý tártibi ózgeredi. Jańa talap boiynsha jumyssyzdarǵa tólem belsendi jumys izdeý kezeńinde beriledi. Onyń mólsheri sońǵy eki jyldaǵy ortasha ailyq tabystyń 45 paiyzyna teń bolady. Bul týraly Eńbek jáne halyqty áleýmettik qorǵaý ministrligi málimdedi, dep habarlaidy ult.kz.
Jumyssyz qalǵan adam aldymen qaida júginýi kerek?
Jumysynan aiyrylǵan azamat eń aldymen mansap ortalyǵyna júginýi qajet. Mamandar onyń kásibi tájiribesi men daǵdylaryn zerdelep, biliktiligine sai bos jumys oryndaryn usynady. Sondai-aq jumys berýshilermen suhbattasýdy uiymdastyrady.
2026 jylǵy 1 qazannan bastap «jumys izdep júrgen adam» mártebesinde bolý merzimi 2 kúnnen 13 kúnge deiin uzartylǵan.
Eger osy ýaqyt ishinde laiyqty jumys tabylmasa, azamatqa resmi túrde jumyssyz mártebesi beriledi. Mansap ortalyǵy bos jumys oryndaryn izdeýdi jalǵastyrady. Qajet bolǵan jaǵdaida qysqa merzimdi kásiptik oqýdan ótý usynylady.
Áleýmettik tólemge qalai ótinish berýge bolady?
Jumyssyz mártebesin alǵannan keiin azamat áleýmettik tólem taǵaiyndaýǵa ótinish bere alady. Ol úshin birneshe tásil qarastyrylǵan:
- eGov.kz portaly;
- Enbek.kz elektrondyq eńbek birjasy;
- ekinshi deńgeidegi bankterdiń mobildi qosymshalary;
- uialy telefonǵa keletin SMS-habarlama arqyly proaktivti qyzmet;
- mansap ortalyqtary;
- «Azamattarǵa arnalǵan úkimet» memlekettik korporatsiiasynyń bólimsheleri.
Áleýmettik tólem taǵaiyndalǵannan keiin de mansap ortalyǵy azamatqa jumys izdeýge kómektesýdi jalǵastyrady.
Jumyssyzdarǵa qansha aqsha tólenedi?
2027 jyldan bastap áleýmettik tólem belsendi túrde jumys izdeý kezeńine taǵaiyndalady. Tólemniń uzaqtyǵy azamattyń mindetti áleýmettik saqtandyrý júiesine qatysý ótiline bailanysty bolady. Alaida tólem merzimi 3 aidan aspaidy.
Tólem mólsheri sońǵy eki jyldaǵy ortasha ailyq tabystyń 45 paiyzyn quraidy. Bul rette esepke alynatyn tabystyń shekti mólsheri eń tómengi jalaqynyń jeti eselengen mólsherinen aspaýy kerek.
Memleket basshysynyń Joldaýynda aitylǵandai, 2027 jylǵy 1 qańtardan bastap eń tómengi jalaqy 85 myń teńgeden 110 myń teńgege deiin ósedi. Osyǵan bailanysty jumyssyzdyq boiynsha áleýmettik tólemniń eń joǵary mólsheri de aiyna 346,5 myń teńgege deiin ulǵaiady.
Tólemdi kimder ala alady?
Bul áleýmettik tólemdi burynǵydai mindetti áleýmettik saqtandyrý júiesine qatysqan azamattar ǵana ala alady.
Ministrlik engiziletin ózgeristerdiń basty maqsaty – jumyssyz qalǵan adamdarǵa turaqty jumys tabýǵa kómektesý jáne olardy eńbek naryǵyna qaita beiimdeý ekenin atap ótti.