Qazaqstanda 2027 jyldan bastap nesie berý talaptary kúsheitilýi múmkin. Ulttyq bank halyqtyń shamadan tys qaryzǵa batýynyń aldyn alý úshin jańa shekteýler engizýdi josparlap otyr, dep habarlaidy ult.kz.
Jańa erejege sáikes, azamattyń barlyq nesiesi men mikrokreditiniń jalpy kólemi onyń segiz jyldyq tabysynan aspaýy tiis. Eger qaryz júktemesi belgilengen mejeden joǵary bolsa, bank nemese mikroqarjy uiymy jańa nesie berýden bas tartýy múmkin.
Ulttyq banktiń málimetinshe, bul bastama qarjy júiesiniń turaqtylyǵyn saqtap, azamattardyń tólem qabiletin baqylaýdy kúsheitýge baǵyttalǵan. Sonymen qatar, bankterdiń tutynýshylyq nesieni retsiz taratýynyń aldyn alý kózdelip otyr.
Mamandardyń aitýynsha, sońǵy jyldary elde smartfon, toi-tomalaq jáne ózge de turmystyq qajettilikter úshin nesie alatyndar kóbeigen. Sonyń saldarynan bankrottyqqa júginetin azamattar sany da artyp keledi.
Alaida sarapshylar jańa talaptardyń keri áseri de bolýy múmkin ekenin aitady. Keibir ekonomister mundai shekteýler shaǵyn jáne orta bizneske qiyndyq týdyryp, halyqtyń bir bóligin beiresmi qaryz kózderine júginýge itermeleýi yqtimal ekenin eskertti.
