Jelide professor Dámetken Súleimenova Batys Qazaqstan oblysynyń týmasy Ainar Ashatuly Ahmetovty izdep málimdeme jasady, dep habarlaidy ult.kz.

Onyń aitýynsha, Ainar Ahmetov Kaspiidegi oqiǵa kezinde óz kúshimen jaǵaǵa aman shyqqan. Sonymen qatar ol qasyndaǵy áskeri qyzmetshige kómektesýge tyrysqanymen, ony jaǵaǵa alyp shyǵa almaǵan.

Dámetken Súleimenova sarbazdyń otbasy qazir onyń jaǵdaiyna alańdap otyrǵanyn jetkizdi. Ainar Batys Qazaqstan oblysy Syrym aýdany Toǵanas eldi mekeninen. Onyń ákesi – II toptaǵy múgedektigi bar azamat, anasynyń densaýlyǵynda kinárat bar ári kópbalaly ana.

«Ol óz kúshimen jaǵaǵa aman shyqqan jáne qasyndaǵy joldasyna kómektesken, biraq ony alyp shyǵa almaǵan. Ainar – BQO, Syrym aýdany, Toǵanastan. Ahmetov Ainardyń ákesi II toptaǵy múgedek, anasy aýyrady, kópbalaly ana. Olar balasymen habarlasa almai otyr. Tek keshe kishi qaryndasymen 1-2 minýt sóilesken, sosyn habar úzilgen. Qazir jelide tiri qalǵandar úsh sarbaz dep kórsetilýde. Bizdiń týysymyz sonda tizimde joq pa, bul qalai? Ainar keshe sóileskende dirildep, durys sóilei almai turǵan siiaqty dep qaryndasy aityp otyr», – dep jazdy professor.

Ministrlik ne deidi? 
 

Qazaqstan Qorǵanys ministrligi áleýmettik jelilerde merzimdi áskeri qyzmettegi matrostar Ahmetov A.A. men Maǵaýiia Á.A. týraly taraǵan aqparatqa túsinikteme berdi. 

Vedomstvonyń málimetinshe, eki áskeri qyzmetshi de aman-esen áskeri bólimde júr jáne qyzmetin jalǵastyryp jatyr.

Buǵan deiin áleýmettik jelilerde Kaspii teńizindegi áskeri oqý-jattyǵýǵa qatysty túrli aqparat taraǵan. Atap aitqanda, professor Dámetken Súleimenova týysy Ainar Ahmetovtiń jaǵdaiyna alańdap, onyń óz kúshimen jaǵaǵa shyqqany týraly jazǵan.

Alaida Qorǵanys ministrligi bul málimetterdi joqqa shyǵardy. Vedomstvonyń habarlaýynsha, Ahmetov pen Maǵaýiia teńizde emes, jaǵalaýda oqý mindetterin oryndaǵan áskeri qyzmetshiler tobynyń quramynda bolǵan.

«Áskeri-teńiz kúshteri ótkizgen oqý-jattyǵý barysynda jeke quramnyń bir bóligi jaǵalaýda bolyp, tiisti oqý mindetterin oryndady. Merzimdi áskeri qyzmettegi matrostar Ahmetov A.A. men Maǵaýiia Á.A. jaǵalaýda oqý mindetterin oryndaǵan áskeri qyzmetshiler tobynyń quramynda boldy. Qazirgi ýaqytta atalǵan áskeri qyzmetshiler áskeri bólimniń ornalasqan jerinde jáne kún tártibine sáikes áskeri qyzmetin atqaryp júr», – delingen ministrlik habarlamasynda.

Osyǵan bailanysty Qorǵanys ministrligi áleýmettik jelilerde atalǵan áskeri qyzmetshilerge qatysty taraǵan aqparattyń shyndyqqa sáikes kelmeitinin málimdedi.

Ne jaǵdai boldy? 
 

Mańǵystaý oblysynda Kaspii teńiziniń jaǵalaýynda ótken áskeri oqý-jattyǵý kezinde 14 áskeri qyzmetshi qaza tapty.

Qaiǵyly oqiǵa 24 qyrkúiekte oqý-jaýyngerlik mindetti oryndaý barysynda bolǵan. Qorǵanys ministrliginiń málimetinshe, aýa raiynyń kúrt nasharlap, jeldiń kúsheiýi saldarynan 17 áskeri qyzmetshini ashyq teńizge alyp ketken. Onyń úsheýi qutqaryldy, 14 áskeri qyzmetshi qaza tapty. 

25 qyrkúiekte iz-túzsiz joǵalǵan sońǵy eki áskeri qyzmetshiniń – serjant Mansur Gýmarov pen matros Miras Turdybekulynyń denesi tabyldy. Osydan keiin izdestirý-qutqarý operatsiiasy aiaqtaldy. 

Aman qalǵan úsh áskeri qyzmetshiniń biri – Aqjol Temiráliev, ekinshisi – Nikita Ýdalov. Nikita Ýdalov dárigerlerdiń baqylaýynda, jaǵdaiy jaqsy ekeni habarlandy. 

Oqiǵaǵa bailanysty qylmystyq is qozǵaldy. Is Qylmystyq kodekstiń 453-babynyń 2-bóligi – aýyr zardaptarǵa ákep soqqan qyzmetke salǵyrt qaraý jáne 465-baby – keme júrgizý qaǵidalaryn buzý boiynsha tergelip jatyr. 

Sonymen qatar oqiǵanyń sebepteri men barlyq mán-jaiyn anyqtaý úshin Úkimettik komissiia quryldy. Tergeý barysynda áskeri qyzmetshilerdiń qaýipsizdigine jaýapty birqatar laýazymdy tulǵa ustaldy. Ishki ister ministrligi iske qatysy bar basqa da tulǵalardy anyqtaý boiynsha tergeý jalǵasyp jatqanyn málimdedi. 

25 qyrkúiek Qazaqstanda Kaspiidegi qaiǵyly oqiǵaǵa bailanysty jalpyulttyq aza tutý kúni bolyp jariialandy. Qaza tapqan áskeri qyzmetshilerdiń otbasylaryna materialdyq jáne psihologiialyq kómek kórsetiletini aityldy. 

Aita keteiik, keshe ǵana memleket basshysy Áskeri reforma josparyn ázirleýdi tapsyrdy. 

Qasym-Jomart Toqaev qaiǵyly oqiǵanyń mán-jaiyn ǵana emes, mundai oqý-jattyǵýdy josparlaýǵa ne túrtki bolǵanyn jáne qoiylǵan mindettiń qazirgi qaýip-qaterlerge qanshalyqty sai keletinin anyqtaýdy talap etti.