Италияның Монтесильвано қаласында шахматтан U14, U16 және U18 жас санаттары бойынша 2026 жылғы жастар арасындағы әлем чемпионаты басталды. Турнирге 87 ел мен аумақтан 790 жас шахматшы жиналды, деп хабарлайды Ult.kz.
Жарыс 15-26 маусым аралығында швейцариялық жүйе бойынша 11 турдан тұрады және классикалық уақыт бақылауымен өтеді. Қазақстандық шахматшылар қыздар мен ұлдар арасында 14, 16 және 18 жасқа дейінгі барлық жас санаттарында бақ сынап жатыр.
Алғашқы партиялар қарсаңында Қазақстан құрамасының бірқатар қатысушылары чемпионаттан күтетін үміттерімен бөлісті.
«Жас шахматшылар үшін бұл турнир тек нәтиже тұрғысынан ғана маңызды емес. Бұл әлемнің ең мықты құрдастарымен ойнап, өз дайындық деңгейіңді тексеруге және құнды халықаралық тәжірибе жинауға мүмкіндік береді. Мен жақсы дайындалдым және мүмкіндігім жоғары деп ойлаймын», — деді әйелдер арасындағы ФИДЕ шебері, Қазақстан Республикасының бес дүркін чемпионы және әлемнің үш дүркін чемпионы, 15 жастағы Айару Алтынбек.
Өз ойымен Қазақстан тарихындағы ең жас гроссмейстер және 16 жасқа дейінгі әлем чемпионы Эдгар Мамедов те бөлісті. Монтесильванода ол 18 жасқа дейінгі санатта, өзінен үлкен қарсыластармен ойнап жатыр.
«Турнир оңай болмайды: барлық қарсыластар өте мықты, сондықтан әр партияға барынша жауапкершілікпен қарау керек. Лайықты өнер көрсетіп, үлкен тәжірибе жинап, әдемі ойын көрсетемін деп үміттенемін. Осы турнирге қатысуға мүмкіндік бергені үшін Қазақстан шахмат федерациясына үлкен алғысымды білдіремін», — деді жас шахматшы.
Италиялық халықаралық төреші Марко Бьяджолидің айтуынша, қазақстандық делегация турнирдегі ең көп қатысушысы бар командалардың қатарына кіреді. Оның сөзінше, мұндай өкілдік Қазақстанда шахматқа деген қызығушылықтың жоғары екенін көрсетеді.
«Қатысушылар саны бойынша Италия, АҚШ және Қазақстан алдыңғы қатарда. Менің ойымша, бұл шахматтың Қазақстанда маңызды орын алатынын көрсетеді. Қазақстандық шахматшылардың мықты өнер көрсетуін күтемін және олардан көп медаль көремін деп үміттенемін», — деді халықаралық төреші.
Жас спортшылардың ата-аналары үшін мұндай жарыстарға қатысу да үлкен сынақ.
«Балаң әлемнің түкпір-түкпірінен келген қарсыластармен тақта басына отырғанда, бұл бір мезетте әрі үлкен мақтаныш, әрі толқу. Әр жеңістің артында орасан еңбек тұр: ерте тұру, күнделікті жаттығу, партияларды түнге дейін талдау. Балаларымызға сенетін, олардың өсуіне көмектесетін адамдар мен ұйымдардың жанымызда болғанына ризамыз», — деді шахматшы Айару Алтынбектің анасы Индира Байтемирова.
Негізгі турнирден бөлек, 16 маусымда Монтесильванода U14, U16 және U18 санаттары бойынша шахмат есептерін шешуден 2-ші жастар арасындағы әлем чемпионаты өтеді. Қатысушыларға 90 минут беріледі, ал әр жас санатындағы үздік ұлдар мен қыздар жеке анықталады.
