Italiianyń Montesilvano qalasynda shahmattan U14, U16 jáne U18 jas sanattary boiynsha 2026 jylǵy jastar arasyndaǵy álem chempionaty bastaldy. Týrnirge 87 el men aýmaqtan 790 jas shahmatshy jinaldy, dep habarlaidy Ult.kz.
Jarys 15-26 maýsym aralyǵynda shveitsariialyq júie boiynsha 11 týrdan turady jáne klassikalyq ýaqyt baqylaýymen ótedi. Qazaqstandyq shahmatshylar qyzdar men uldar arasynda 14, 16 jáne 18 jasqa deiingi barlyq jas sanattarynda baq synap jatyr.
Alǵashqy partiialar qarsańynda Qazaqstan quramasynyń birqatar qatysýshylary chempionattan kútetin úmitterimen bólisti.
«Jas shahmatshylar úshin bul týrnir tek nátije turǵysynan ǵana mańyzdy emes. Bul álemniń eń myqty qurdastarymen oinap, óz daiyndyq deńgeiińdi tekserýge jáne qundy halyqaralyq tájiribe jinaýǵa múmkindik beredi. Men jaqsy daiyndaldym jáne múmkindigim joǵary dep oilaimyn», — dedi áielder arasyndaǵy FIDE sheberi, Qazaqstan Respýblikasynyń bes dúrkin chempiony jáne álemniń úsh dúrkin chempiony, 15 jastaǵy Aiarý Altynbek.
Óz oiymen Qazaqstan tarihyndaǵy eń jas grossmeister jáne 16 jasqa deiingi álem chempiony Edgar Mamedov te bólisti. Montesilvanoda ol 18 jasqa deiingi sanatta, ózinen úlken qarsylastarmen oinap jatyr.
«Týrnir ońai bolmaidy: barlyq qarsylastar óte myqty, sondyqtan ár partiiaǵa barynsha jaýapkershilikpen qaraý kerek. Laiyqty óner kórsetip, úlken tájiribe jinap, ádemi oiyn kórsetemin dep úmittenemin. Osy týrnirge qatysýǵa múmkindik bergeni úshin Qazaqstan shahmat federatsiiasyna úlken alǵysymdy bildiremin», — dedi jas shahmatshy.
Italiialyq halyqaralyq tóreshi Marko Biadjolidiń aitýynsha, qazaqstandyq delegatsiia týrnirdegi eń kóp qatysýshysy bar komandalardyń qataryna kiredi. Onyń sózinshe, mundai ókildik Qazaqstanda shahmatqa degen qyzyǵýshylyqtyń joǵary ekenin kórsetedi.
«Qatysýshylar sany boiynsha Italiia, AQSh jáne Qazaqstan aldyńǵy qatarda. Meniń oiymsha, bul shahmattyń Qazaqstanda mańyzdy oryn alatynyn kórsetedi. Qazaqstandyq shahmatshylardyń myqty óner kórsetýin kútemin jáne olardan kóp medal kóremin dep úmittenemin», — dedi halyqaralyq tóreshi.
Jas sportshylardyń ata-analary úshin mundai jarystarǵa qatysý da úlken synaq.
«Balań álemniń túkpir-túkpirinen kelgen qarsylastarmen taqta basyna otyrǵanda, bul bir mezette ári úlken maqtanysh, ári tolqý. Ár jeńistiń artynda orasan eńbek tur: erte turý, kúndelikti jattyǵý, partiialardy túnge deiin taldaý. Balalarymyzǵa senetin, olardyń ósýine kómektesetin adamdar men uiymdardyń janymyzda bolǵanyna rizamyz», — dedi shahmatshy Aiarý Altynbektiń anasy Indira Baitemirova.
Negizgi týrnirden bólek, 16 maýsymda Montesilvanoda U14, U16 jáne U18 sanattary boiynsha shahmat esepterin sheshýden 2-shi jastar arasyndaǵy álem chempionaty ótedi. Qatysýshylarǵa 90 minýt beriledi, al ár jas sanatyndaǵy úzdik uldar men qyzdar jeke anyqtalady.
