Меркіде қаза болған Мадинаның өліміне қатысты жаңа мәліметтер жарияланды. Белсенді Жан Ахмадиевтің сөзінше, марқұмның туыстары оған Мадинаны жуындыру кезінде түсірілген бейнематериалды жолдаған, деп хабарлайды ult.kz.
Оның айтуынша, кадрлардан марқұмның басының бірнеше жерінде тігіс бар екенін байқауға болады.
Сонымен қатар Мадинаның қайғылы оқиғадан аз уақыт бұрын пәтер іздегені туралы ақпарат тарады. Жан Ахмадиевтің мәлімдеуінше, марқұм баспана жалдау мәселесі бойынша пәтер иесімен сөйлескен. Әңгіме барысында ол үйдегі жиһаздың бар-жоғын сұрап, қажет болған жағдайда жиһаз қалдыру мүмкіндігін нақтылаған. Сондай-ақ пәтерді ұзақ мерзімге жалға алу мәселесін де сұраған.
Осыған байланысты белсенді Мадинаның өз-өзіне қол жұмсағаны туралы болжамға күмән келтіретінін айтты.
«Мен Мадинаның өз-өзіне қол жұмсағанына күмәндана бастадым. Себебі бізге келген дауыстық хабарламада ол пәтердегі жиһаздың бар-жоғын сұрап, қажет болса жиһаз қалдыруға болатынын нақтылаған. Сонымен қатар баспананы ұзақ мерзімге жалға алу мүмкіндігін сұраған», – деді Жан Ахмадиев.
Алайда аталған деректер Мадинаның өліміне қатысты нақты қорытынды жасауға жеткіліксіз. Қазір әлеуметтік желіде тараған бейнематериалдар мен айтылған мәліметтер тергеудің ресми қорытындысы болып саналмайды.
Оқиғаның нақты себептері мен мән-жайы тиісті сараптамалар мен тергеу амалдары аяқталғаннан кейін анықталуы тиіс.
