Семейде 52 жастағы әйелді өлтірген ер адамға сот үкімі шықты. Ол 12 жылға бас бостандығынан айырылды, деп хабарлайды ult.kz.
Сот материалдарына сәйкес, қайғылы оқиға 2026 жылғы 17 сәуірде болған. Ер адам мас күйінде бұрынғы әйеліне қызғаныш салдарынан шабуыл жасаған. Ол әйелді ағаш битамен бірнеше рет ұрған. Жәбірленуші алған жарақаттарынан оқиға орнында көз жұмған.
Қылмыстық іс ҚР Қылмыстық кодексінің 99-бабы 1-бөлігі («Адам өлтіру») бойынша қаралды.
Марқұмның туыстарының айтуынша, әйел бұған дейін күйеуіне ажырасқысы келетінін айтқан. Осыдан кейін ер адам оның жеке заттары мен құжаттарын, сондай-ақ балаларының құжаттарын өртеп жіберген. Кейін әйелді аңдып жүрген.
Сот ер адамды кінәлі деп танып, 12 жылға бас бостандығынан айыру жазасын тағайындады. Сонымен қатар марқұмның ағасына 10 миллион теңге көлемінде моральдық өтемақы өндірілді.
Марқұмның артында екі кәмелетке толмаған баласы қалған. Сот олардың әрі қарайғы жағдайын шешу үшін Семей қаласының қорғаншылық және қамқоршылық органына тиісті тапсырма берген.
Үкім әзірге заңды күшіне енген жоқ.
