Атырауда Қарабалиндер әулетінің өліміне қатысты резонансты қылмыстық іс бойынша сот отырысы басталды. Бұл іс бойынша Сұлтан Сәрсемәлиев айыпталушы ретінде жауап беріп жатыр. Тергеу дерегінше, ол қайын жұртының қазасына қатысы барын мойындаған, деп ult.kz тілшісі dalanews.kz сайтына сілтеме жасап хабарлайды.
Сот барысында осы істі тергеген Атырау облысы полиция департаменті тергеу басқармасының аса маңызды істер жөніндегі аға тергеушісі Темірхан Қажымұратов күдіктіге қалай шыққандарын айтып берді.
Тергеушінің сөзінше, іс аясында 40-тан астам адамнан жауап алынған. Олардың қатарында марқұмдардың туыстары, көршілері және оқиғаға қатысты қандай да бір мәлімет бере алатын азаматтар болған.
Бастапқыда ерлі-зайыпты із-түссіз жоғалғандар ретінде тіркелген. Осыдан кейін полицейлер олардың банк есепшоттарын тексеріп, ақша қозғалысын зерттей бастаған. Қаражат қайда, қашан және кімге аударылғаны мұқият қаралған.
"Алдымен есепшоттар тексерілді. Ақша түсті ме, қай жерде жұмсалды – бәрі қаралды. Сол кезде күдікті Сәрсемәлиевтің шотына ақша аударып жүргені белгілі болды. Кейін ауылға апарып-әкелген такси жүргізушісі анықталды. Ол қараша айында ерлі-зайыпты мен баласын жеткізген. Қайтар жолда оның жанында Мейрамгүл Мұқанғалиева да болған", – деді Темірхан Қажымұратов.
Қазір сотта қылмыстық істің барлық мән-жайы қаралып жатыр. Тергеу тарапы бұл істі аса ауыр қылмыс ретінде бағалап отыр. Ал айыпталушыға қатысты соңғы шешімді сот шығарады.
