03 сәу, 2018 сағат 09:42

Қазақстандықтар мекенжай бойынша онлайн тіркелуге енді 20 минут жұмсайды

Электрондық үкімет порталында тұрғылықты мекенжай бойынша онлайн тіркелу рәсімі өзгерді, деп хабарлады «Азаматтарға арналған үкіметтің» баспасөз қызметінен.

Енді онлайн-тіркеу үшін азаматтарға 20 минут жеткілікті. Сондай-ақ Қазақстан Республикасының Салық кодексіне енгізілген өзгерістерге сәйкес, биыл  қаңтар айынан бастап тіркеу үшін мемлекеттік баж алынбайды.

Еске сала кетейік, бұрын Электрондық үкімет порталы арқылы тіркелгенде 10 % АЕК көлемінде мемлекеттік баж төлеу керек болатын. Сосын «Азаматтарға арналған үкімет» мемлекеттік корпорациясының фронт-офисіне келіп, жеке куәлік чипіне тіркеу туралы деректер жазбасын енгізу үшін көші-қон қызметкеріне жүгінуі қажет еді. Ал биылғы наурыз айынан бастап портал арқылы  тұрғылықты жері бойынша тіркелу рәсімі айтарлықтай жеңілдетілді. 

Енді жылжымайтын мүлік иесі және тіркелетін азамат egov.kz порталында тіркелгеннен кейін, тіркелуші өтініш беріп, оны меншік иесі өзінің электрондық цифрлық қолтаңбасымен (ЭЦҚ) растауы тиіс.

Өтініш берілгеннен кейін  деректер шамамен 10 минутта өңделеді, содан кейін тіркелген мекенжай бойынша  анықтама  алуға  тапсырыс беруге болады.  Бұл қызметке ЭЦҚ-сы бар кез келген азамат Қазақстанның барлық аймақтарында қол жеткізе алады.