فوتو: Altaynews.kz
ۇستازداردىڭ ۇستازى, حالىق مۇعالٸمٸ, بٸرەگەي ەدٸستەمەلەردٸڭ اۆتورى جەنە ۇلتتىق پەداگوگيكا تاريحىندا ايرىقشا ورنى بار قانيپا بٸتٸباەۆا تۋرالى ەستەلٸكتەر تولاستار ەمەس. ۇلى ۇستازدان تەلٸم العان شەكٸرتتەرٸ ونىڭ كەسٸبيلٸگٸن, شەكسٸز مەيٸرٸمٸن جەنە ەرەكشە تۇلعالىق قاسيەتتەرٸن ساعىنىشپەن ەسكە الادى. Ult.kz نازارلارىڭىزعا قانيپا بٸتٸباەۆادان ەكٸ جىل بٸلٸم العان تالانتتى شەكٸرتٸنٸڭ ەستەلٸگٸن ۇسىنادى.
ۋاقىت – توقتاۋسىز ٶزەن. بٸراق ادامزات تاريحىندا سارقىلماس مەڭگٸلٸك قۇندىلىقتار بار. ولار – بٸلٸم, پاراسات, مەيٸرٸم. وسى اسىل قاسيەتتەردٸ جٷرەگٸنە تۇمار ەتكەن جان – ۇستاز. ال قانيپا ومارعاليقىزى – ۇستازدىڭ ۇستازى, بٸلٸمنٸڭ شامشىراعى, رۋحتىڭ قايراتكەرٸ ەدٸ.
مەن قانيپا اپايدىڭ الدىندا بار بولعانى ەكٸ جىل عانا وقۋشى بولدىم. بٸراق سول ەكٸ جىل – مەنٸڭ بٷكٸل عۇمىرىما ازىق بولعان تاعىلىم مەكتەبٸ. حان اپامدى ەردايىم مەڭگٸلٸك ۇستازىم دەپ بٸلەمٸن, ونىڭ شەكٸرتٸ بولعانىمدى ٷلكەن ماقتانىش سانايمىن.
قانيپا ومارعاليقىزى بٸزدٸ تەك ەدەبيەتكە باۋلىعان جوق, ٶمٸردٸڭ ٶزٸن ٷيرەتتٸ. ول بٸزگە ابايدىڭ عاقليياسىن, ماعجاننىڭ اسقاق ارمانىن, مۇقاعاليدىڭ مۇڭىن, شەرحاننىڭ شىنشىلدىعىن سانامىزعا سٸڭٸردٸ. ونىڭ سىنىبىندا ەر شەكٸرت ٶز ويىمەن دارالاندى, پٸكٸرٸن اشىق ايتتى. قانيپا اپاي بٸزگە: “شىندىقتى قورىقپاي سٶيلە. ەشقاشان جالتاقتاما. ەدٸلەتتٸلٸك ٷشٸن كٷرەسە بٸل!” – دەپ ٷنەمٸ قايتالاپ وتىراتىن. بۇل سٶزدەر مەن ٷشٸن ٶمٸرلٸك قاعيداعا اينالدى.
مەن ٶزٸمدٸ قانيپا اپايدىڭ ەڭ سٷيٸكتٸ شەكٸرتٸمٸن دەپ ويلايتىنمىن. بٸراق مەكتەپ بٸتٸرگەن سوڭ تٷسٸندٸم – ول ەربٸر شەكٸرتٸنە وسىنداي ەرەكشە سەزٸم سىيلاي بٸلگەن ەكەن. ونىڭ جٷرەگٸ تەڭدەي بٶلٸنگەن شەكسٸز ماحابباتقا تولى ەدٸ. ەرقايسىمىز ٶزٸن ەرەكشە سەزٸنٸپ ٶستٸك, ٶمٸرلٸك ازىق بولعان ۇلاعات الدىق. بٸز – ونىڭ بالالارى ەدٸك. بٸز ٷشٸن قۋانىپ, بٸز ٷشٸن الاڭدايتىن. بٸز جەتٸستٸككە جەتسەك, بالاشا شاتتاناتىن, قاتەلٸك جاساساق, جٷرەگٸ اۋىراتىن.
قانيپا اپايدىڭ ەڭ باستى قاسيەتٸ – ٶز ٸسٸنە دەگەن ادالدىعى ەدٸ. ونىڭ اقىل-كەڭەسٸن الۋعا تالاي مينيسترلەر مەن ەكٸمدەر كەلەتٸن. ال بٸزگە: “ولارمەن ويلارىڭدى بٷكپەي بٶلٸسٸڭدەر, تايسالماڭدار!” – دەپ اقىل ايتاتىن. سول سەبەپتٸ, بٷگٸندە قانداي لاۋازىمدى ادامنىڭ الدىندا بولساق تا, ٶز ويىمىزدى اشىق ايتىپ, ارتىق جالباقتامايمىز. بۇل – تەك ماعان عانا ەمەس, قانيپا اپايدىڭ ەربٸر شەكٸرتٸنە سٸڭٸرگەن اسىل قاسيەتتەرٸنٸڭ بٸرٸ.
قانيپا اپايدىڭ اماناتى – ادالدىقپەن قىزمەت ەتۋ, بٸلٸمنٸڭ شىراعىن سٶندٸرمەۋ, ٸزگٸلٸك پەن ۇلتتىق رۋحتى بيٸك ۇستاۋ. بٷگٸندە قاي سالادا جٷرسەك تە, ۇستازىمىزدان العان تاعىلىم – ٶمٸرٸمٸزدٸڭ تەمٸرقازىعى.
ۇلى ۇستازدىڭ مەيٸرٸمٸ دە, تەربيەلٸك تەسٸلٸ دە ەرەكشە ەدٸ. “مىنا قۇلاقتان كٷن كٶرٸنەدٸ!” – دەپ ەركەلەتكەندە, انامنىڭ مەيٸرٸمٸنە بٶلەنگەندەي كٷي كەشەتٸنمٸن. قازٸر بالام ەلحاننىڭ قۇلاعىنان كٷن كٶرٸنگەندە, قانيپا ومارعاليقىزىنىڭ سول مەيٸرٸمٸن ساعىنىشپەن ەسكە الامىن…
قانيپا بٸتٸباەۆا – تەك بٸلٸمنٸڭ عانا ەمەس, قازاق رۋحانيياتىنىڭ شامشىراعى. ونىڭ ارتىندا قالعان ەڭبەكتەرٸ, جازعان كٸتاپتارى, زەرتتەۋلەرٸ – ۇلتقا قىزمەت ەتەتٸن باعا جەتپەس مۇرا.
قانيپا ومارعاليقىزى – مەڭگٸلٸك ۇستاز. ونىڭ ەسٸمٸ, ەڭبەگٸ, شەكٸرتتەرٸنە بەرگەن شاپاعاتى ەشقاشان ۇمىتىلمايدى. ۇستازدىڭ الدىنان ٶتكەن ەربٸر تٷلەك – بولاشاققا جول نۇسقاعان شىراقشى. ەگەر بٸز سول شىراقتى جاعا بٸلسەك, ۇستازىمىزدىڭ ەڭبەگٸ ەش كەتپەگەنٸ.
ۇستازىمنىڭ رۋحىنا تاعزىم ەتٸپ, مەڭگٸلٸك قۇرمەتپەن ەسكە الامىن!
