Foto: Altaynews.kz
Ustazdardyń ustazy, halyq muǵalimi, biregei ádistemelerdiń avtory jáne ulttyq pedagogika tarihynda airyqsha orny bar Qanipa Bitibaeva týraly estelikter tolastar emes. Uly ustazdan tálim alǵan shákirtteri onyń kásibiligin, sheksiz meiirimin jáne erekshe tulǵalyq qasietterin saǵynyshpen eske alady. Ult.kz nazarlaryńyzǵa Qanipa Bitibaevadan eki jyl bilim alǵan talantty shákirtiniń esteligin usynady.
Ýaqyt – toqtaýsyz ózen. Biraq adamzat tarihynda sarqylmas máńgilik qundylyqtar bar. Olar – bilim, parasat, meiirim. Osy asyl qasietterdi júregine tumar etken jan – ustaz. Al Qanipa Omarǵaliqyzy – ustazdyń ustazy, bilimniń shamshyraǵy, rýhtyń qairatkeri edi.
Men Qanipa apaidyń aldynda bar bolǵany eki jyl ǵana oqýshy boldym. Biraq sol eki jyl – meniń búkil ǵumyryma azyq bolǵan taǵylym mektebi. Han apamdy árdaiym máńgilik ustazym dep bilemin, onyń shákirti bolǵanymdy úlken maqtanysh sanaimyn.
Qanipa Omarǵaliqyzy bizdi tek ádebietke baýlyǵan joq, ómirdiń ózin úiretti. Ol bizge Abaidyń ǵaqliiasyn, Maǵjannyń asqaq armanyn, Muqaǵalidyń muńyn, Sherhannyń shynshyldyǵyn sanamyzǵa sińirdi. Onyń synybynda ár shákirt óz oiymen daralandy, pikirin ashyq aitty. Qanipa apai bizge: “Shyndyqty qoryqpai sóile. Eshqashan jaltaqtama. Ádilettilik úshin kúrese bil!” – dep únemi qaitalap otyratyn. Bul sózder men úshin ómirlik qaǵidaǵa ainaldy.
Men ózimdi Qanipa apaidyń eń súiikti shákirtimin dep oilaitynmyn. Biraq mektep bitirgen soń túsindim – ol árbir shákirtine osyndai erekshe sezim syilai bilgen eken. Onyń júregi teńdei bólingen sheksiz mahabbatqa toly edi. Árqaisymyz ózin erekshe sezinip óstik, ómirlik azyq bolǵan ulaǵat aldyq. Biz – onyń balalary edik. Biz úshin qýanyp, biz úshin alańdaityn. Biz jetistikke jetsek, balasha shattanatyn, qatelik jasasaq, júregi aýyratyn.
Qanipa apaidyń eń basty qasieti – óz isine degen adaldyǵy edi. Onyń aqyl-keńesin alýǵa talai ministrler men ákimder keletin. Al bizge: “Olarmen oilaryńdy búkpei bólisińder, taisalmańdar!” – dep aqyl aitatyn. Sol sebepti, búginde qandai laýazymdy adamnyń aldynda bolsaq ta, óz oiymyzdy ashyq aityp, artyq jalbaqtamaimyz. Bul – tek maǵan ǵana emes, Qanipa apaidyń árbir shákirtine sińirgen asyl qasietteriniń biri.
Qanipa apaidyń amanaty – adaldyqpen qyzmet etý, bilimniń shyraǵyn sóndirmeý, izgilik pen ulttyq rýhty biik ustaý. Búginde qai salada júrsek te, ustazymyzdan alǵan taǵylym – ómirimizdiń temirqazyǵy.
Uly ustazdyń meiirimi de, tárbielik tásili de erekshe edi. “Myna qulaqtan kún kórinedi!” – dep erkeletkende, anamnyń meiirimine bólengendei kúi keshetinmin. Qazir balam Elhannyń qulaǵynan kún kóringende, Qanipa Omarǵaliqyzynyń sol meiirimin saǵynyshpen eske alamyn…
Qanipa Bitibaeva – tek bilimniń ǵana emes, qazaq rýhaniiatynyń shamshyraǵy. Onyń artynda qalǵan eńbekteri, jazǵan kitaptary, zertteýleri – ultqa qyzmet etetin baǵa jetpes mura.
Qanipa Omarǵaliqyzy – máńgilik ustaz. Onyń esimi, eńbegi, shákirtterine bergen shapaǵaty eshqashan umytylmaidy. Ustazdyń aldynan ótken árbir túlek – bolashaqqa jol nusqaǵan shyraqshy. Eger biz sol shyraqty jaǵa bilsek, ustazymyzdyń eńbegi esh ketpegeni.
Ustazymnyń rýhyna taǵzym etip, máńgilik qurmetpen eske alamyn!
