Фото: Adyrna.kz
Қазақстандық режиссер Елзат Ескендірдің «Әбіл» фильмі 31-Vesoul халықаралық Азия кинофестивалінде (Франция) бірден үш маңызды жүлдені жеңіп алды, деп хабарлайды Ult.kz.
Марапаттар тізімі:
- Jury Grand Prize (Қазылар алқасының бас жүлдесі)
- Critical Jury Prize (Киносыншылар алқасының жүлдесі)
- NETPAC Jury Prize (NETPAC қазылар алқасының жүлдесі)
Фильмнің мазмұны мен ерекшелігі
«Әбіл» фильмі тәуелсіздік алғаннан кейінгі Қазақстандағы әлеуметтік-саяси қиындықтар мен қараусыз қалған ауыл өмірін суреттейді. Туындыда колхоз-совхоздың тарауы, мүліктің жекешеленуі, жемқорлықтың пайда болуы, социализмнен капитализмге өтудегі халықтың екіұдай сезімі шынайы бейнеленген.
Фильмді халықаралық қазылар алқасы жоғары бағалап, қазақ халқының рухани және психологиялық күйіне терең әлеуметтік талдау жасай алғанын ерекше атап өтті.
Фото: Facebook.com
Фестиваль туралы
Vesoul халықаралық Азия кинофестивалі — Азия киносына арналған Еуропаның ең көне және беделді фестивальдерінің бірі. Ол жас режиссерлердің шығармаларын қолдап, олардың халықаралық деңгейде танылуына мүмкіндік береді.
Кино сапарының жалғасы
«Әбіл» фильмі бұған дейін 29-Пусан халықаралық кинофестивалінде әлемдік премьерасын өткізген. Сонымен қатар, Гонконг халықаралық Азия кинофестивалі мен 48-Гетеборг халықаралық кинофестиваліне қатысып, көрермендер мен сыншылардың қызығушылығын тудырды.
Франциядағы премьерада фильмді режиссер Елзат Ескендір мен актер Ерлан Төлеутай таныстырды. Алдағы уақытта туынды бірнеше халықаралық кинофестивальдерде көрсетіледі деп жоспарлануда.
973 рет оқылды
