Aqtóbede qoǵamda qyzý talqyǵa túsken jylqyshy Rahat Sársenovtiń isine qatysty sharýa qojalyǵynyń iesi Tájiǵali Eleýov alǵash ret málimdeme jasady. Ol áleýmettik jelide taraǵan pikirlerge jaýap berip, oqiǵaǵa qatysty óz nusqasyn baiandady, dep habarlaidy ult.kz.
Tájiǵali Eleýovtiń aitýynsha, Rahat Sársenov uzaq jyldar boiy qojalyqta jumys istegenimen, onyń araq ishkenine jáne buǵan deiin birneshe bas jylqynyń joǵalýyna kóz juma qaraǵan. Alaida sońǵy oqiǵadan keiin quqyq qorǵaý organdaryna júginýge májbúr bolǵanyn aitty.
Onyń sózinshe, bul iske bir ǵana adam emes, qylmystyq top qatysy bar. Tipti olardyń biri sot úkimimen jazasyn ótep jatqan kórinedi. Sondai-aq Eleýov áleýmettik jelide taraǵan «Rahat Sársenov tolyq aqtaldy» degen aqparattyń shyndyqqa sáikes kelmeitinin málimdedi.
«Bireýler ony áleýmettik jelide qaralym jinaý úshin “baidan zábir kórgen qaharman” retinde kórsetip otyr», – dedi ol.
Al Tájiǵali Eleýovtiń qyzy Aiaýlym Tájiǵalieva sońǵy ýaqytta otbasynyń aýyr psihologiialyq qysymǵa ushyraǵanyn aitty.
«Otbasymyzben birge qiyn kezeńdi bastan ótkerip jatyrmyz. Ákeme, otbasyma, baýyrlaryma jáne balalaryma baǵyttalǵan qorlaý, qarǵys pen óshpendilikke toly pikirlerdi oqý bizge aýyr tiip otyr. Men úshin ol – eń ardaqty áke, aiaýly ata ári naǵyz azamat. Ony bizdiń otbasymyz, dostary, áriptesteri jáne tanityn adamdar dál osylai biledi. Endi ákemniń óz ustanymyn aityp, bolǵan jaǵdaiǵa qatysty pikirin jetkizýge múmkindigi bar. Árkim óz qorytyndysyn ózi jasaidy. Al aqiqatty bir Alla ǵana biledi», – dep jazdy ol.
Aita keteiik, buǵan deiin Aqtóbe oblystyq soty Rahat Sársenovke qatysty isti qaita qarap, úkimniń kúshin joiyp, ony sot zalynan bosatqan bolatyn. Osy oqiǵadan keiin qoǵamda jylqyshyny qoldaǵan azamattar qarjylai kómek kórsetip, baspana syilaǵan edi. Al endi iske qatysty ekinshi tarap ta óz ýájin jariialap otyr.
