Qazaqstanda otbasynda janjal shyǵarǵandar baspanadan ýaqytsha shyǵarylady jáne psihokorrektsiialyq baǵdarlamadan ótýge mindetteledi. Bul týraly QR Parlamenti Májilisiniń depýtaty Aigúl Nurkina málimdedi, dep habarlaidy QazAqparat.
«Parlamentte depýtattar korpýsy usynǵan Otbasylyq-turmystyq zorlyqqa qarsy is-qimyl zań jobasy talqylanyp jatyr. Talqylaý barysynda onyń ataýy «Turmystyq qarym-qatynastaǵy zorlyq-zombylyqqa qarsy is-qimyl» dep ózgertildi. Talqylaý jumystary óte belsendi júrip jatyr, oǵan osy saladaǵy eń belsendi qoǵamdyq birlestik ókilderi shaqyrylǵan», - dedi A. Nurkina QR Aqparat jáne qoǵamdyq damý ministrligi ótkizgen onlain jinalysta.
Onyń aitýynsha, bul bastamany depýtattar usynyp otyr.
«Depýtattar zorlyq-zombylyq faktisi bolyp, adam ómirine qaýip tóngen jaǵdaida otbasylyq agressor men jábirlenýshiniń 10 kúnge deiin bir baspanada turýyna tyiym salý bastamasyn qoldady. Sot qarym-qatynasy ornaǵan jaǵdaida, quqyq buzýshy psihokorrektsiialyq baǵdarlamadan ótýge mindetteledi. Qajet bolǵan jaǵdaida ózge baspanasy bar-joǵyna qaramastan ortaq baspanadan ýaqytsha shyǵýǵa da májbúr bolady», - dedi depýtat.
Qazirgi ýaqytta túzetýler men ózgeristerdiń alǵashqy bóligi Úkimetke jiberilgen. Osy aptada ózgeristerdiń taǵy bir bóligi joldanady.
