Májilis depýtattary sharýalardyń qiyn máselelerin kóterdi, dep habarlaidy "Ult Aqparat".
«AMANAT» fraktsiiasy partiiasynyń depýtattary Erbolat Satybaldin men Amanjol Áltai qystan qiyn jaǵdaidan shyqqan sharýa qojalyqtarynyń máselelerin kóterip, zardap shekken sharýa qojalyqtary men ólim-jitimge ushyraǵan mal basy sanaǵyn júrgizý kerek dep esepteidi. Sonymen qatar sharýa qojalyǵy joq aýyl turǵyndarynyń tirkeýde bolmaǵan maldardyn sanaqqa engizýge ruqsat berý (halyq aýzynda «zelenyi korridor» dep atalyp ketken) qajet dep, Ulytaý oblysynda tótenshe jaǵdai jariialaýdy usyndy. Budan bólek, juttan tityqqan sharýalarǵa qoldaý retinde aýylsharýashylyq maqsattarǵa alǵan nesielerine keshirim jariialaý jáne mal ólekselerin joiý jumystaryn júrgize otyryp, maldarǵa juqpaly aýrýlarǵa qarsy ekpe jumystaryn da memleket esebinen uiymdastyrý qajet ekenin aityp otyr.
"Arqada mal qyryldy, qyrylmaǵany, kóterem bolyp, terisine ilinip, uzyn saryǵa kirdi. Iri sharýalardy aitpaǵanda, shaǵyn aýyldardyń ózinen 100-den astam jylqy qulaǵan. Aýyl turǵyndary baǵyp otyrǵan maldarynyń jutqa ushyrady dep dabyl qaqqanyna ai jarymnan asty. Tek qana Qarajaldyń ózinde – 566 bas jylqynyń óleksesi jinaldy. Jinalmai dala shashylyp jatqany qanshama?! Jut tek Ulytaý jerinde ǵana emes, Aqmola, Qaraǵandy oblystaryn da sharpydy. Mundai qyspaq jylda soqpaidy, osyndai aýyr jaǵdaiǵa qalǵan elge der kezde memleketten qoldaý qajet edi. Jedel kómek beretin ýaqyttan kesh qaldyq. Jaiylymdyq tebinderdi arshyp, jem-shóp taratyp, mal basyn alyp qalýǵa jasaǵan áreket mardymsyz, shala boldy.
Qystyń ortasynda jaýǵan jaýyndy kórip, bilip otyrǵan jaýapty memlekettik mekemeler bola tura, Ulytaý oblysynda bolyp jatqan tabiǵattyń qaýipti jáne dúlei qubylystarynyń jutqa ákelip soǵatyny týraly boljam jasap, jergilikti ákimdikterge eskerte almady. Memlekettik baqylaý men retteýdiń salǵyrttyǵyn osydan da kórsek bolady.
Áriptesim, Májilis depýtaty Amanjol Áltaidyń jut týraly aitqan janaiqaiyna Aýyl sharýashylyq ministrligi «maldyń jappai ólimi faktileri joq, Ulytaý oblysynda 67 jylqy maly ólimi tirkeldi» dep aýzyn qý shóppen súrtip, sharýalardyń ózin kinálaýdan árige barmady.
Jut jaiyn qalyń eldiń arasyna baryp, bilýdiń ornyna komissiia jiberip, ólekse sanaýmen shekteldi. Úkimettiń bul tirligin Arqa jurty "Qarnymnyń ashqanyna emes, qadirimniń qashqanyna jylaimynǵa» balap otyr.
Keshegi Kovid-19 náýbeti kelgende Jańaarqanyń sharýalary bal
qymyzy men shipaly saýmalyn Astana men Qaraǵandy oblysynyń
aýrýhanalaryna tegin jetkizip, naýqastardyń saýyǵyp ketýine kómektesip, pandemiiamen kúresip jatqan dárigerlerge kúsh-qýat bergenin qalaisha umytamyz?! Sary qymyz sapyrǵan sándi kelinshekter qymyzdy kúbige quiyp, kúrpildetip pisip, bir ýaqytta on myń litr qymyz daiyndap, Ginnestiń rekordtar kitabyna enip, Qazaqtyń dástúrin álemge pash etken Jańaarqaǵa mundaida qol ushyn sozý, bilgen adamǵa - mindet edi!" -dedi depýtat Erbolat Satybaldin.
