Jelide qyzý talqylanyp jatqan jýrnalistikaǵa qatysty oraiy kelgen birer oi:
1. BAQ-tyń birneshe salasy bar ekeni belgili. Bul oraida "Ánshi qaptap ketti" degen sózdiń negizinen BAQ-tyń bir túrine – telearnaǵa qatysty ekenin umytpaǵan abzal. Mysaly gazet-jýrnalda iaki internet redaktsiialarda ánshi/tamadalardyń jumys istep, napaqa tapqanyn kóre bermeisiz. Onda áli de jýrnalistikany oqyǵandar nemese soǵan bir taban jaqyn, qolynda qalamy bar mamandyq ieleri qyzmet etedi.
2. Telearnadaǵy baǵdarlamany ánshi nemese akter júrgizse, bul olardyń jýrnalistikany jaýlap alǵanyn bildire qoimas. Ol júrgizýshiniń artynda redaktorlar men stsenarii avtorlary, iaǵni jýrnalister men qalam ieleri bar. Sondyqtan intellekt, oi, paiym men qalam barda jýrnalistika ómirsheń bola bermek.
3. Jýrnalistikany joǵary deńgeide meńgerý úshin eń áýeli adamnyń jany jýrnalist bolýy shart. Odan keiin jýrnalistikanyń túrlerine bailanysty salalyq tereń bilim, tájiribe men odan týatyn biliktilik qajet. Bul rette qazaq tilinde oqýlyqtar men zertteýlerdiń tapshy ekeni de belgili. Máselen, osy salaǵa kelgende media-menedjmentke qatysty kitaptardy izdei bastadym, alaida qazaq tilinde mardymdy dúnie taptym dei almaspyn. Sondyqtan shet tilderde jaryq kórgen salaǵa qatysty ozyq ádebietterdi aýdarǵan jón. Sonymen qatar óndiristik tájiribe de mańyzdy. Bul rette "Egemen Qazaqstan" elimizdegi barlyq jýrnalistika fakýltetteriniń stýdentterin tájiribeden ótkizýge ázir ekenin aitqym keledi.
4. Qazir jýrnalistikanyń mindeti tek jalań aqparatty jetkizýmen ǵana shektelmeidi. Aqparat jetkizýde tipti álemniń eń jedel aqparat agenttikteriniń ózi qazir balama BAQ-pen - áleýmettik jelimen básekelese almaidy. Qazir oqyrmanǵa/kórermenge máseleniń mánin tereń túsinýge septesetin saraptamalyq taldaý, qundylyǵyn joǵaltpaityn tanymdyq material kóbirek kerek. Sondyqtan jýrnalistikada sheberlik shyńdaǵysy keletinderdiń shet tilderin úirenip, ózge (saiasattaný, filosofiia, áleýmettaný, ónertaný, zań, menedjment tb) salalarda magistratýra oqyp alǵandary jón dep oilaimyn. Belgili bir salany jetik biletin, shet tilin jetik meńgergen sarapshy-jýrnalister qaida bolsa da óz ornyn tabatyny anyq.
5. Bireý óziniń darynymen, bireý óziniń júieli daiyndyǵymen jýrnalist bolatyny belgili. Bireýge - kásip, bireýge - násip degendei. Al sol daryndyny baǵyttap, talapshyldy týra jolǵa túsirý úshin jýrnalistika mektepteri qajet-aq. Sondyqtan KSRO-daǵydai jýrnalisterdi jalǵyz QazUÝ daiyndasyn demes buryn, KSRO men búgingi Qazaqstandaǵy BAQ sanyn salystyrǵan abzal bolar. Qatelespesem, ol kezde telearna, radio, gazetterdi bir qoldyń saýsaqtarymen-aq sanaýǵa bolatyn. Qazir olardy sanap shyǵýdyń ózi qiyn.
6. Jýrnalistika fakýltetteri tek BAQ-ta ǵana emes, sol BAQ-pen jáne halyqpen jumys isteitin baspasóz qyzmeti mamandaryn da ázirleidi. Ortalyq jáne aimaqtyq memlekettik organdardyń bárinde baspasóz qyzmeti bar jáne onyń árqaisysynda kemi 5-6 maman jumys isteidi. Qyzmettiń bul túri iri kompaniialarǵa da tán. Endeshe jýrnalistika fakýltetteri kóptik etpeidi.
7. Jýrnalistika fakýlteti eń bastysy, erkin oily azamattardy tárbieleidi. Ol osynysymen de qymbat. Elimizdegi eń ózekti máselelerdi kóterip, ulttyq qundylyqtardy nasixattap júrgen azamattar kóbine jýrnalister arasynan shyǵyp jatatyny da sondyqtan bolsa kerek.
Darhan Qydyráliniń feisbýktegi jazbasynan
