Keshe "Habar" agenttigi kezekti bir baǵdarlamasynyń túsirilimine shaqyrǵan soń barǵanbyz. Sonda, baiqalǵany - televiziia salasy jýrnalistika mamandyǵyn árkimniń talaýyna berip, ábden julmalap, it terisin basyna qaptap-aq jatyr eken, túbi tynysh bolsyn. Telehabarǵa qatysatyn 7 adamǵa 3 telejúrgizýshi taǵaiyndapty. Álgi úsheýi de jýrnalist emes, biri - aktrisa, ekeýi - biznes salasynyń ókilderi. Al, taqyryp - bilim. Onyń ózinde orta mektepte jalpy bilim berý máselesi. 7 qonaqtyń ishinde úsheýimiz JOO-da sabaq bergenimiz bolmasa, orta mektepke qatysymyz joq adamdarmyz. Meili, "sóilep úirengen aýyzdar ǵoi, jybyrlaǵanyn qoimas, birdeme aitar" degenderi shyǵar.
Hosh, sonymen túsirilimdi bastap kep jibersin. Úsh júrgizýshimizdiń de betteri jyltyrap, kiim kiis, júris-turystary men kórikteri kóz tartyp turǵanymen sózderi súrindire bastady. Telehabardy bastaý úshin sýflerdegi mátinnen biznesmen júrgizýshimiz baqandai 5 ret jańylyp, qaitalady da sońǵy retkisi mátindi ejektep oqyǵandai úzip-úzip aitsa da "boldy" destik. Kelesi júrgizýshi jigit te qatyrmady. Ózi de tym momaqan bala eken, qaitalap júrip, mińgirlep birdemelerdi zorǵa jetkizgen boldy. Al, bárimiz úmit artqan aktrisanyń áreketi ana ekeýinen de soraqy boldy. Teatrda arnaiy qoiylǵan daýyspen sýflerdegi mátindi sýdyrtyp oqyp shyqpaqshy bolǵan, obaly neshik. Qyrsyq shalǵanda sala qulash quramalas sabaqtas sóilemderge demi jetpei orta jolda tunshyǵyp qaldy. Ol da birneshe ret qaitalap oqýyna týra keldi. Júrgizýshilermen salystyrǵanda, qansha degenmen aýditoriiada sabaq berip júrgen ustazdar emes pe, qonaqtar qamshy saldyrmady. Sózderin jik-jigimen tastap, oilaryn táýir-aq jetkizip jatyr. Biraq, rejisserden "jarlyq" túsip olardy da qaitalap sóiletýge týra keldi. Sebebi, tehnikalyq aqaý shyqqan, mikrofon istemei qalǵan taǵy birdeme. Arasynda júrgizýshiler bizge suraq qoiyp alady da jaýabyn tolyq tyńdamastan orta joldan úzip áketip, álde bir siýjet kórsete salady. Siýjeti siýjet-aq eken. Aityp sóz shyǵyndaýǵa turmaityn, syn kótermeitin nársege bas qatyrmai-aq qoidyq. Onda da kásibi jýrnalister emes, ózge salanyń mamandary suhbat júrgizip otyrǵany tipti tańdanys týdyrdy. Muǵalimder otbasynan túsirilgen bir siýjette filosof ǵalym stend-apqa shyǵyp, keiipkerlerin áńgimege tartyp otyr. Kelesi siýjette biznesmen jigit aýyl mektebinen reportaj júrgizip tur. Sonda, bul jigitterde jýrnalistikadan ózge ainalysatyn sharýa qalmaǵan ba? Álde, jýrnalist mamandardyń bári elde qalmai ǵaryshqa ushyp ǵaiyp bop ketken be?
Osylaisha, birneshe saǵat ýaqytymyzdy zaia ketirip, bir baǵdarlamaǵa qatysqan boldyq. Onyń ne bolyp shyǵatynyn kezinde kóre jatarmyz. Aitaiyn degenim, "shymshyq soisa da qasapshy soisyn" deitin halyq edik qoi. Teleefirdi qashanǵy beikásibi jandarǵa oirandatyp, kórermendi úrkite beremiz? Ainalaiyn, redaktor áriptester! Televiziia mátinine qurmalas sabaqtas sóilem qoldanylmaityn álemdik standart qaida?! Meilinshe, aýyz eki tilge jaqyndaý qysqa da nusqa jai sóilemder jazylýy qajet ekenin shynymen de bilmeisizder me? Telemátin - qarapaiym bolýy kerek, biraq, qarabaiyr emes. Biraq, buǵan bas qatyratyn tiri jan televiziia aýylynan tabyla qoimaidy-aý!
Qýandyq Shamahaiulynyń feisbýktegi jazbasynan
