كەشە "حابار" اگەنتتٸگٸ كەزەكتٸ بٸر باعدارلاماسىنىڭ تٷسٸرٸلٸمٸنە شاقىرعان سوڭ بارعانبىز. سوندا, بايقالعانى - تەلەۆيزييا سالاسى جۋرناليستيكا ماماندىعىن ەركٸمنٸڭ تالاۋىنا بەرٸپ, ەبدەن جۇلمالاپ, يت تەرٸسٸن باسىنا قاپتاپ-اق جاتىر ەكەن, تٷبٸ تىنىش بولسىن. تەلەحابارعا قاتىساتىن 7 ادامعا 3 تەلەجٷرگٸزۋشٸ تاعايىنداپتى. ەلگٸ ٷشەۋٸ دە جۋرناليست ەمەس, بٸرٸ - اكتريسا, ەكەۋٸ - بيزنەس سالاسىنىڭ ٶكٸلدەرٸ. ال, تاقىرىپ - بٸلٸم. ونىڭ ٶزٸندە ورتا مەكتەپتە جالپى بٸلٸم بەرۋ مەسەلەسٸ. 7 قوناقتىڭ ٸشٸندە ٷشەۋٸمٸز جوو-دا ساباق بەرگەنٸمٸز بولماسا, ورتا مەكتەپكە قاتىسىمىز جوق ادامدارمىز. مەيلٸ, "سٶيلەپ ٷيرەنگەن اۋىزدار عوي, جىبىرلاعانىن قويماس, بٸردەمە ايتار" دەگەندەرٸ شىعار.
حوش, سونىمەن تٷسٸرٸلٸمدٸ باستاپ كەپ جٸبەرسٸن. ٷش جٷرگٸزۋشٸمٸزدٸڭ دە بەتتەرٸ جىلتىراپ, كيٸم كيٸس, جٷرٸس-تۇرىستارى مەن كٶرٸكتەرٸ كٶز تارتىپ تۇرعانىمەن سٶزدەرٸ سٷرٸندٸرە باستادى. تەلەحاباردى باستاۋ ٷشٸن سۋفلەردەگٸ مەتٸننەن بيزنەسمەن جٷرگٸزۋشٸمٸز باقانداي 5 رەت جاڭىلىپ, قايتالادى دا سوڭعى رەتكٸسٸ مەتٸندٸ ەجەكتەپ وقىعانداي ٷزٸپ-ٷزٸپ ايتسا دا "بولدى" دەستٸك. كەلەسٸ جٷرگٸزۋشٸ جٸگٸت تە قاتىرمادى. ٶزٸ دە تىم موماقان بالا ەكەن, قايتالاپ جٷرٸپ, مٸڭگٸرلەپ بٸردەمەلەردٸ زورعا جەتكٸزگەن بولدى. ال, بەرٸمٸز ٷمٸت ارتقان اكتريسانىڭ ەرەكەتٸ انا ەكەۋٸنەن دە سوراقى بولدى. تەاتردا ارنايى قويىلعان داۋىسپەن سۋفلەردەگٸ مەتٸندٸ سۋدىرتىپ وقىپ شىقپاقشى بولعان, وبالى نەشٸك. قىرسىق شالعاندا سالا قۇلاش قۇرامالاس ساباقتاس سٶيلەمدەرگە دەمٸ جەتپەي ورتا جولدا تۇنشىعىپ قالدى. ول دا بٸرنەشە رەت قايتالاپ وقۋىنا تۋرا كەلدٸ. جٷرگٸزۋشٸلەرمەن سالىستىرعاندا, قانشا دەگەنمەن اۋديتورييادا ساباق بەرٸپ جٷرگەن ۇستازدار ەمەس پە, قوناقتار قامشى سالدىرمادى. سٶزدەرٸن جٸك-جٸگٸمەن تاستاپ, ويلارىن تەۋٸر-اق جەتكٸزٸپ جاتىر. بٸراق, رەجيسسەردەن "جارلىق" تٷسٸپ ولاردى دا قايتالاپ سٶيلەتۋگە تۋرا كەلدٸ. سەبەبٸ, تەحنيكالىق اقاۋ شىققان, ميكروفون ٸستەمەي قالعان تاعى بٸردەمە. اراسىندا جٷرگٸزۋشٸلەر بٸزگە سۇراق قويىپ الادى دا جاۋابىن تولىق تىڭداماستان ورتا جولدان ٷزٸپ ەكەتٸپ, ەلدە بٸر سيۋجەت كٶرسەتە سالادى. سيۋجەتٸ سيۋجەت-اق ەكەن. ايتىپ سٶز شىعىنداۋعا تۇرمايتىن, سىن كٶتەرمەيتٸن نەرسەگە باس قاتىرماي-اق قويدىق. وندا دا كەسٸبي جۋرناليستەر ەمەس, ٶزگە سالانىڭ ماماندارى سۇحبات جٷرگٸزٸپ وتىرعانى تٸپتٸ تاڭدانىس تۋدىردى. مۇعالٸمدەر وتباسىنان تٷسٸرٸلگەن بٸر سيۋجەتتە فيلوسوف عالىم ستەند-اپقا شىعىپ, كەيٸپكەرلەرٸن ەڭگٸمەگە تارتىپ وتىر. كەلەسٸ سيۋجەتتە بيزنەسمەن جٸگٸت اۋىل مەكتەبٸنەن رەپورتاج جٷرگٸزٸپ تۇر. سوندا, بۇل جٸگٸتتەردە جۋرناليستيكادان ٶزگە اينالىساتىن شارۋا قالماعان با? ەلدە, جۋرناليست مامانداردىڭ بەرٸ ەلدە قالماي عارىشقا ۇشىپ عايىپ بوپ كەتكەن بە?
وسىلايشا, بٸرنەشە ساعات ۋاقىتىمىزدى زايا كەتٸرٸپ, بٸر باعدارلاماعا قاتىسقان بولدىق. ونىڭ نە بولىپ شىعاتىنىن كەزٸندە كٶرە جاتارمىز. ايتايىن دەگەنٸم, "شىمشىق سويسا دا قاساپشى سويسىن" دەيتٸن حالىق ەدٸك قوي. تەلەەفيردٸ قاشانعى بەيكەسٸبي جاندارعا ويرانداتىپ, كٶرەرمەندٸ ٷركٸتە بەرەمٸز? اينالايىن, رەداكتور ەرٸپتەستەر! تەلەۆيزييا مەتٸنٸنە قۇرمالاس ساباقتاس سٶيلەم قولدانىلمايتىن ەلەمدٸك ستاندارت قايدا?! مەيلٸنشە, اۋىز ەكٸ تٸلگە جاقىنداۋ قىسقا دا نۇسقا جاي سٶيلەمدەر جازىلۋى قاجەت ەكەنٸن شىنىمەن دە بٸلمەيسٸزدەر مە? تەلەمەتٸن - قاراپايىم بولۋى كەرەك, بٸراق, قارابايىر ەمەس. بٸراق, بۇعان باس قاتىراتىن تٸرٸ جان تەلەۆيزييا اۋىلىنان تابىلا قويمايدى-اۋ!
قۋاندىق شاماحايۇلىنىڭ فەيسبۋكتەگٸ جازباسىنان
