Áńgime bylai boldy...
Arǵy demalysta túnge qarai vatsaptaǵy jeke tobymyzǵa prodiýserimiz Áliia Qudaibergenovadan «dabyl» kelip tústi. Aldynda ǵana jýrnalisterimiz Shymkentke issaparmen ketken. Eki otbasynyń jaǵdailaryn kózben kórgen soń, beinetaspaǵa túsirip jibergen ǵoi. Sony kórip, júregi aýyrǵan Álekeń: bulardy qalaida habarǵa túsirýimiz kerek. Túsirip ǵana qoimai úi alyp berýimiz kerek! dep talap qoidy.
Buǵan deiin de talai janǵa paidamyz tidi ǵoi. Birneshe otbasynyń Allanyń qalaýymen, kóptiń kómegimen, bizdiń septigimizben baspanaly bolǵany da ras. Biraq, jetekshimizdiń tórt kúnniń ishinde eki birdei úi alyp berý týraly talaby artyqtaý kórindi (biraq, ony ózine aitý qaida?!).
Buiryq túsken soń bárimiz iske kiristik. Árkim tanityn dáýletti adamdaryna habarlasty. Post jazdy. Dostaryna ótinish bildirdi. Birinshi kúni jolymyz bolmady. Júz myń teńge, eki júz myń teńge beremiz deýshiler shyqqanymen, baspananyń máselesin sheshetin adam tabylmady.
Ekinshi kúni de qyz-jigitter tynym tappai izdeýdi jalǵastyrdy. Túske deiin tym-tyrys. Tús aýa aramyzdaǵy úlkenimiz Amangeldi aǵamyzdan jaqsy habar jetti. Tolqyn esimdi tanys kásipkeri: Alla razylyǵy úshin kómekteseiin. Aldymen ol otbasynyń jaǵdaiyn kózimizben kórýimiz kerek depti. Qudaiǵa myń da bir shúkirimizdi aityp, izdeý jumystaryn ary qarai jalǵastyrdyq.
Úshinshi kún. Keshegi kásipkerdiń jigitteri ertemen baryp, ana kisilerdiń jaǵdaiyn kóripti. Sol jerde birden iske kirisip, ainalasy eki- úsh saǵattyń ishinde unatqan úilerin alyp beripti. Bes bólme. Segiz sotyq jeri bar. Sýy, gazy qosylǵan. Osy jańalyqty estigende qyz-jigitterdiń ózderi baspanaly bolǵandai qýanǵandaryn-ai (Jýrnalisterdiń jaǵdaiy belgili ǵoi. Sol buiryq berýshi basshymyzdyń óziniń úii joq. Qyzdarmen birge páter jaldap turady. Kásipkerlerdi «qylǵyndyryp» júrgen Abekeńniń úii bolsa bankte «tutqynda» tur).
Keshke jumystan qaityp bara jatyrmyz. Men osy bir úidiń máselesin sheshkenimizge de táýba dep kelemin. Abekeń telefonynyn aqtarystyryp, izdeý jumystaryn ary qarai jalǵastyryp jatyr. Mýzykant adam ǵoi (Kezinde Amangeldi Sándibaevtyń «Jibek joly» degen tobynyń aty dúrildep turǵanyn aǵa býyn bilýi tiis). Ásheiinde kóp sózge joq aǵamyzdyń qyzyl tilinen mai tamady:
«Orazada jasaǵan jaqsylyqtyń saýaby mol», «Alla saǵan júz ese ǵyp qaitarady», «Batasyn alasyń, eki dúniede de abyroily bolasyń» dep adamnyń júregin ezetin sózderdi jaýdyryp jatyr. Júrekten shyqqan janaiqai júrekke báribir jetedi ǵoi. Bir kezde Ýáli degen tanysy: erteń keleiin. Sodan keiin kóre jatarmyz dep jaýap berdi. E, Alla! Óziń jar bola kór! dedik ishtei.
Ertesine túsirilim boldy. Ýáde bergen Ýáli keldi. Júregi jumsaq, qoly ashyq azamat eken. Sol jerde ekinshi baspananyń máselesin sheship berdi. Kóp balaly otbasyna basqalai da kómek beretinin aitty. Balalardyń qýanǵanyn kórseńiz ǵoi...
Qasietti Oraza aiynda eki otbasy baspanaly boldy. Aqshalai da kómek kórsetildi. Qyzylordadan bir apamyz qinalyp hat jazǵan eken. Aitqali dosym sol jerde ol kisiniń esep-shotyna qomaqty qarjy aýdaryp jiberdi.
Osylaisha, prodiýserimizdiń talaby artyǵymen oryndaldy.
Allaǵa - Madaq!
Jomart jandarǵa - alǵys!
Oraza qabyl bolsyn!
Beisen Quranbektiń feisbýktaǵy jazbasynan
