Densaýlyq saqtaýdy damytý respýblikalyq ortalyǵynyń ujymy qyzmetkerler arasynda dene jattyǵýyn ótkizý týraly bastamaǵa qoldaý bildirdi, dep habarlaidy "Ult aqparat".
«Jattyǵýdy biz ortalyǵymyzdyń keń dálizinde, áleýmettik araqashyqtyqty saqtai otyryp jasaimyz. Oǵan ortalyq qyzmetkerleri, jas erekshelikterine qaramastan erikti túrde jinalady. Kóbine jattyǵýdy ózim júrgizemin. Kúnde túrli qimyl-qozǵalystar jasaimyz», - dedi Densaýlyq saqtaýdy damytý respýblikalyq ortalyǵy bas direktorynyń kómekshisi Rimma Shitkenova.
Densaýlyq saqtaýdy damytý respýblikalyq ortalyǵynyń bas direktory Qanat Tósekbaevtyń aitýynsha, jumys ýaqyty bastalar aldynda 10 minýt dene jattyǵýyn jasaý adamdy sergitip, eńbek qabilettiligin arttyrady.
«Keńsede bir orynda tapjylmai otyryp, jumys isteý densaýlyqqa keri áserin de tigizedi. Máselen, omyrtqa qisaiady, moiynnyń qan tamyrlary bileýlenedi, júike aýrýlary paida bolady. Sondyqtan, býyndy jazyp, qan ainalymyn jaqsartý úshin jattyǵýǵa 10 minýt bólgen durys. Ári bul jańashyldyqty eń aldymen qol astyndaǵy qyzmetkerleriniń densaýlyǵyn oilaityn ár basshy qoldaýy tiis dep oilaimyn», - deidi Qanat Tósekbaev.
Eske sala keteiik, QR Densaýlyq saqtaý ministrliginiń 2020 jylǵy 28 qazandaǵy buiryǵy boiynsha dene jattyǵýymen shuǵyldanýdyń úlgilik qaǵidalary bekitilgen bolatyn. Erejege sáikes, dene shynyqtyrý jattyǵýlary jumys kúniniń birinshi jartysynda oryndalyp, uzaqtyǵy 10-15 minýttan aspaýy tiis.
