Almatyda «Bank RBK», «Qazaq Banki» jáne «Eurasian Bank» bankterinen 188 milliard teńgeden astam qarajatty jymqyrý isi boiynsha sot úkimi shyqty, dep habarlaidy "Ult aqparat".
Aiyptylardyń qatarynda eks-bankir Jomart Ertaev, astyq oligarhy Nurlan Tileýbaev, Álimjan Tileýbaev, Aqan Sultanov, Serik Atabai jáne Oksana Shestakova bar.
Qylmystyq istiń materialdary negizinde Nurlan Tileýbaev Jomart Ertaevtyń kómegimen qamtamasyz etilmegen astyq qolhattary arqyly nesie alǵan. Sonymen qatar, Ertaev Tileýbaevty ózi yqpal ete alatyn áriptesterimen tanystyrǵan. Al Tleýbaev bolsa, aqshanyń bir bóligin Ertaevqa aýdarýy kerek boldy.
Sot Jomart Ertaevty qylmystyq top qurǵany jáne alaiaqtyq jasaǵany úshin kináli dep tanyp, 9 jylǵa bas bostandyǵynan aiyrdy. Al Nurlan Tileýbaevty 10 jyl merzimge materialdyq jaýapkershilikke bailanysty laýazymdardy atqarý quqyǵynan aiyra otyryp 9 jylǵa sottaldy. Ol jazasyn qaýipsizdigi ortasha koloniiada óteitin boldy. Álimjan Tileýbaevqa iri kólemde alaiaqtyq jasady degen aiyp taǵyldy. Sot ony 5,5 jylǵa sottady. Para bopsalady dep aiyptalǵan Aqan Sultanov kináli dep tanyldy. Biraq, ol shaǵymdaný merziminiń aiaqtalýyna bailanysty jazadan bosatyldy. Asa iri kólemde alaiaqtyq jáne jalǵan qujattar jasaý, olardy satý boiynsha aiyptalǵan Oksana Shestakova men Serik Atabaiǵa bas bostandyǵynan aiyrý jazasy taǵaiyndaldy. Serik Atabai - 5,5 jylǵa, al Shestakov 5 jylǵa sottaldy. Ekeýi de jazalaryn qaýipsizdigi ortasha koloniiada óteitin bolady.
Sot Nurlan Tileýbaev, Álimjan Tileýbava, Jomart Ertaev, Serik Atabai, Oksana Shestakovadan «DSFK (DSFK) Arnaiy Qarjy Kompaniiasy» JShS-niń paidasyna 97 mlrd teńgeden astam jáne memleketke 2 mlrd teńgeden astam baj salyǵyn óndirip alý týraly sheshim shyǵardy. Al 46 mlrd teńgeden astam jáne 1 milliard teńgeden astam memlekettik baj «Qazaq Banki» paidasyna bolsa, 24 mlrd-tan astam teńge jáne 725 million teńge memlekettik baj salyǵy «Eýraziialyq bank» AQ paidasyna bolmaq.
Aiyptylarǵa azamattyq isti aiaqtaýǵa eki ai ýaqyt berildi.
Aita ketý kerek, eks bankir Jomart Ertaev 2018 jyldyń mamyrynda Máskeýde ustalǵan bolatyn. Oǵan asa iri kólemde qarjy jymqyrdy degen aiyp taǵylǵan bolatyn.
Birneshe aiǵa sozylǵan sot protsesinen soń Jomart Ertaev Bank RBK tiesili 140 mlrd teńgeni jymqyrdy dep aiyptalyp, 11 jylǵa sottalǵan edi.
