Qazaqstandyq shahmatshy Bibisara Asaýbaeva men ózbekstandyq grossmeister Javohir Sindarovtyń úilený toiy ótetini belgili boldy. Bul aqparatty Sindarovtyń atasy Komil Sindarov rastady, dep habarlaidy ult.kz.
Jýrnalist Olimjon Ýsarovtyń habarlaýynsha, Komil Sindarov nemeresiniń bolashaq jary týraly pikir bildirip, eki shahmatshynyń otbasyn qurý týraly sheshimin qoldaitynyn jetkizgen.
Onyń sózinshe, Javohir úshin ómirlik seriginiń shahmatty túsinýi asa mańyzdy. Sebebi sportshy jyl boiy halyqaralyq týrnirlerge qatysyp, ýaqytynyń basym bóligin shetelde ótkizedi.
“Úilený toiy bolady. Bul nekeden úmitimiz zor. Eger Javohir shahmatty túsinbeitin qyzǵa úilense, qiyndyqtar týyndaýy múmkin. Ol jyldyń 12 aiynyń 11 aiyn shetelde, jarystarda ótkizedi. Janyndaǵy adam onyń ómir saltyn túsinip, saparlaryna birge shyǵýy kerek. Al shahmatqa qyzyqpaityn janǵa mundai ómirge beiimdelý ońai emes. Sondyqtan bul odaq biz úshin barlyq jaǵynan qolaily”, – dedi Komil Sindarov.
Sondai-aq ol Bibisaranyń qazaqstandyq ekenin erekshe atap ótip, bul nekeniń eki el arasyndaǵy dostyq qarym-qatynasqa da oń yqpal etýi múmkin ekenin aitty. Osy tusta Komil Sindarov Ámir Temir dáýirindegi áýletter arasyndaǵy nekelik odaqtar týraly tarihi mysaldy eske alǵan.
Aita keteiik, Bibisara Asaýbaeva men Javohir Sindarovtyń qarym-qatynasy 2026 jyldyń kókteminde kópshilik nazaryn aýdarǵan edi. Eki shahmatshynyń birge túsken sýretteri men Parijge jasaǵan saparynan keiin olardyń arasynda romantikalyq bailanys bar ekeni týraly áńgime taraǵan. Keiin Javohirdiń otbasy jastardyń qarym-qatynasyna qarsy emes ekeni habarlandy. Endi sportshynyń atasy úilený toiynyń ótetinin ashyq málimdep otyr.
Ázirge toidyń naqty kúni men qai jerde uiymdastyrylatyny jariialanǵan joq.
Bibisara Asaýbaeva men Javohir Sindarov – halyqaralyq shahmat arenasynda óner kórsetip júrgen tanymal grossmeisterler. Ekeýi de kásibi sporttaǵy jolyn jalǵastyryp, álemdik deńgeidegi jarystarǵa qatysyp keledi.
Bibisara Asaýbaeva kim?
Bibisara Asaýbaeva – qazaqstandyq shahmatshy, halyqaralyq grossmeister jáne blits shahmattan úsh dúrkin álem chempiony. Ol 2004 jyly 26 aqpanda Taraz qalasynda dúniege kelgen. Shahmatpen bala kezinen ainalysyp, jasóspirimder arasyndaǵy halyqaralyq jarystarda joǵary nátijeler kórsete bastady. 2011 jyly Braziliiada ótken jasóspirimder arasyndaǵy álem chempionatynda 8 jasqa deiingi qyzdar arasynda altyn medal jeńip aldy. Bibisara Qazaqstan atynan álemdik deńgeidegi shahmat týrnirlerine qatysyp, halyqaralyq arenada tanymal boldy. 2021 jyly Polshanyń Varshava qalasynda ótken álem chempionatynda blits shahmattan jeńimpaz atandy. Osy jetistiginiń arqasynda ol blitsten álem chempiony atanǵan eń jas shahmatshy retinde Ginnestiń rekordtar kitabyna endi. Sol jyly rapid shahmattan álem chempionatynda kúmis medal ielendi.
2022 jyly blitsten álem chempiony ataǵyn sátti qorǵap, ekinshi ret qatarynan top jardy. Bul jeńister ony álemdegi eń myqty jas shahmatshylardyń qataryna qosty. 2025 jyly Bibisara klassikalyq shahmat boiynsha halyqaralyq grossmeister ataǵyn alyp, Qazaqstannan shyqqan osyndai dárejege jetken ekinshi áiel shahmatshy atandy. Sol jyldyń jeltoqsanynda Katardyń Doha qalasynda ótken álem chempionatynda ýkrainalyq Anna Mýzychýkty jeńip, blitsten úshinshi márte álem chempiony boldy. Bul jeńisi oǵan 2026 jylǵy úmitkerler týrnirine qatysýǵa múmkindik berdi. Bibisara Asaýbaeva sporttaǵy jetistikterimen Qazaqstan shahmatynyń halyqaralyq bedelin arttyrýǵa úles qosyp keledi. Búginde ol álemdik deńgeidegi bedeldi jarystarǵa qatysyp júrgen elimizdiń tanymal shahmatshylarynyń biri.
