Aktrisa Dariǵa Badyqova el qorǵap, adam ómirin arashalap júrgen azamattarǵa án arnaǵanyn aitty, dep habarlaidy ult.kz.

Óner iesi áleýmettik jelidegi jazbasynda óz ómirin qaterge tigip, ózgelerdi qutqaryp júrgen jandarǵa alǵys bildirdi.

“Eli úshin otqa da, sýǵa da túsip, óz ómirin qaterge tigip, ózgeniń ómirin arashalap júrgen erjúrek qorǵaýshylarymyzǵa arnalady! Sizderdiń erlikterińiz eldiń esinde, janqiiarlyq eńbekterińiz — halyqtyń júreginde!” – dep jazdy aktrisa.

Badyqovanyń aitýynsha, án Prezidenttik orkestrdiń “Abroi” tobymen birge oryndalǵan. 
Aita keteiik, Dariǵa Badyqova Oljas Abai ekeýiniń mahabbat hikaiasyn aityp berdi.

Dariǵa Badyqova kim? 
 

Dariǵa Bolatqyzy Badyqova – qazaqstandyq aktrisa, ánshi jáne kinoprodiýser. Ol 1985 jyly 1 jeltoqsanda Jambyl oblysynyń Moiynqum aýylynda dúniege kelgen. Temirbek Júrgenov atyndaǵy Qazaq ulttyq óner akademiiasynda “Mýzykalyq drama jáne rejissýra” mamandyǵy boiynsha bilim alǵan. Óner jolyn rejisser Bolat Atabaevtyń “Aqsarai” mýzykalyq teatrynda bastaǵan. Teatr sahnasynda “Qyz Jibek” qoiylymyndaǵy Qamqa beinesin somdaǵan.

Keiin kino men telehikaialarǵa túsip, kópshilikke tanyldy. Kórermen ony ásirese “Kelinjan” telehikaiasyndaǵy Aisara róli arqyly biledi. Sondai-aq “Qazaqsha biznes” filmder seriiasyna, “Ǵashyq júrek”, “Traktorshynyń mahabbaty” jobalaryna qatysqan. 2023 jyly jaryq kórgen “Taptym-aý seni” romantikalyq komediiasynda prodiýser ári basty róldi oryndaýshy retinde tanyldy. Bul filmde akter Oljas Abaimen birge oinaǵan. Keiin atalǵan kartinanyń jalǵasyn túsirip, kino óndirisindegi jumysyn jalǵastyrdy.