Atyraý oblysyndaǵy Jangeldin aýylynda ata-anasy men eki baýyrynan aiyrylǵan Aqbaian Muqanǵalieva ápkesinen aýylǵa qashan baratyndaryn jii suraidy eken. Qazir ol týystarynyń qamqorlyǵynda kúndelikti ómirge qaita beiimdelip júr, dep habarlaidy ult.kz.

Aqbaianǵa jaqyndary ata-anasynyń qazasyn áli estirtpegen.

Otbasynyń týysy Ádemi Shylmaǵambetovanyń aitýynsha, dárigerler ázirge qaiǵyly habardy jetkizbeýge keńes bergen. Aqbaian týysynyń úiinde turady. Jaqyndary ony apta saiyn psiholog pen nevrologqa aparyp, balalarymen kezdestirip turady. Sondai-aq ol tigin tigip, jazý-syzýmen ainalysyp júr. 

Ápkesi áleýmettik jelide Aqbaiannyń kúndelikti ómirine arnalǵan paraqsha ashqan. Onda onyń sýret salyp, serýendep, jaqynymen áńgimelesken sátteri jariialanady. Beinejazbalardyń birinde Aqbaiannyń buryn sot oryndaýshysynyń kómekshisi bolyp jumys istegeni aitylǵan. Kadrlarda onyń noýtbýk pen qujattarǵa qarap otyrǵanyn kórýge bolady. 

Aqbaiannyń bes balasy bar. QazAqparattyń 3 qyrkúiektegi habarynda onyń psihikalyq densaýlyq ortalyǵynan shyqqannan keiin balalarymen kezdeskeni jazylǵan. Sol kezdegi málimet boiynsha, tórt balasy kámeletke tolmaǵandardy beiimdeý ortalyǵynda, kenje uly sábiler úiinde bolǵan. Ortalyq direktory Qundyz Ǵiniiatova Aqbaiannyń ata-ana quqyǵynan aiyrylmaǵanyn túsindirgen. 
Aita keteiik, Jelide Aqbaian Muqanǵalievanyń atynan paraqsha ashyldy.

Ne jaǵdai boldy?

Eske salaiyq, 2025 jyldyń sońynda Atyraý oblysynda bir otbasynyń tórt múshesiniń habarsyz ketkeni belgili boldy. Keiin Aqbaiannyń ákesi men anasynyń, aǵasy men ápkesiniń qaza tapqany anyqtaldy. Bul is boiynsha onyń burynǵy kúieýi Sultan Sársemáliev 2026 jyldyń shildesinde ómir boiyna bas bostandyǵynan aiyryldy. Keiin sot úkimi zańdy kúshine endi. 

Tergeý barysynda Aqbaian Muqanǵalievanyń adam óltirý qylmysyna qatysy anyqtalǵan joq. Oǵan qatysty qylmys týraly habarlamaý deregi boiynsha júrgizilgen is te toqtatyldy. Qazir ol emin jalǵastyryp, jaqyndarynyń qoldaýymen ómirge beiimdelip keledi.