Máskeýde ustalyp, úi qamaqta otyrǵan qazaqstandyq tanymal bankir Jomart Ertaev sotta Qazaqstandaǵy natsional-patriottardyń oǵan qoqan-loqy kórsetip jatqandaryn aitty. Bul jóninde "Kommersant" jazdy.
"Olar Reseidi Qazaqstannyń telekommýnikatsiialyq naryǵynan yǵystyrǵysy keledi. Eger biz qazir TNT-ny joǵaltsaq, qazaqstandyqtardyń kelesi urpaǵy túrik serialdarynan tárbie alatyn bolady", - dep keltirdi basylym onyń sózin.
Ertaevtyń aitýynsha, onyń qylmystyq qýdalanýynda "qarjylai múddeden" góri saiasi múdde basymyraq.
"Jaqynda FJÓQ qyzmetkerleri onyń júrip-turýyn baqylap otyrý úshin oǵan elektrondy bilezik taǵady", - dep jazdy gazet.
Jomart Ertaev kei jyldary Alians-bank pen Eýraziialyq bankti basqardy, Bank RBK men Qazaq Banki direktorlar keńesiniń keńesshisi, sonymen qatar, "Alma TV" bas direktory boldy.
Eske sala keteiik, 8 mamyrda Máskeý ortalyǵyndaǵy Moskva-Siti biznes-ortalyǵynyń mańynda arnaiy jasaq sarbazdary qazaqstandyq bankir ári kásipker Jomart Ertaevty ustady. Keiin Qazaqstannyń Ishki ister ministrliginiń ókilderi qazaqstandyq bankir ári kásipker Jomart Ertaevtyń ne sebepti ustalǵanyn aitty.
"Ol "Bank RBK" AQ direktorlar keńesiniń tóraǵasynyń keńesshisi bola otyryp, kelisilgen JShS-larǵa 80 million dollar kóleminde banktik qaryz berýdi lobbilegen, sondai-aq, alǵan qarajattardy aldaǵy ýaqytta qaitarmaý maqsatynda áreket etken", - dep habarlady ministrlik ókilderi.
