Foto: gov.kz
Jetisý oblysynyń ortalyǵy Taldyqorǵan qalasynda jylýmen qamtý nysandaryn salý jobalaryna shamamen 5,7 mlrd teńge bólindi. Tiisti qaýlyǵa Premer-ministr Oljas Bektenov qol qoidy, dep habarlaidy Ult.kz.
Atalǵan qarajat qaladaǵy Ońtústik-Batys jańa turǵyn aýdanynda qazandyq pen jylý jelilerin tartý jobalaryn aiaqtaýǵa baǵyttalady.
Búginde Taldyqorǵan qalasynyń ortalyqtandyrylǵan jylýmen jabdyqtaý júiesinde jalpy qýaty 400 Gkal/saǵ bolatyn 10 qazandyq jumys isteidi. Jylý jelileriniń jalpy uzyndyǵy 179 shaqyrymdy quraidy, ortasha tozý deńgeii – 62%. «Basqýat» ortalyq qazandyǵy 1980 jyly paidalanýǵa berilgen, onyń negizgi jabdyqtary 71% tozǵan.
Oblys ortalyǵyndaǵy halyq sany jyl saiyn artyp kele jatqandyqtan, «Basqýat» qazandyǵy qosymsha jylý júktemesin tolyq qamtamasyz ete almai otyr.
Osyǵan bailanysty júktemeni azaitý jáne kezeń-kezeńimen ekologiialyq taza energiia kózderine kóshý maqsatynda qalada qýaty 49 Gkal/saǵ bolatyn qazandyqtyń qurylysy júrgizilýde.
Joba quny kelisimshart boiynsha 11,1 mlrd teńgeni quraidy. Qazirgi tańda qurylys jumystarynyń shamamen 60%-y oryndaldy. Nysandy paidalanýǵa berý 2026 jylǵy qyrkúiek aiyna josparlanǵan.
Jańa qazandyqtyń tolyqqandy jumys isteýin qamtamasyz etý úshin Ońtústik-Batys turǵyn aýdanyna jylý jelilerin tartý jobasy qatar júrgizilýde. Atalǵan jobany aiaqtaý da osy jyldyń kúzine josparlanǵan.
Jobalardy ýaqtyly júzege asyrý nátijesinde «Bolashaq», «Kóktem», «Birlik» jáne «Qulager» shaǵyn aýdandarynda 2024–2026 jyldary salynǵan kópqabatty turǵyn úiler men áleýmettik nysandar sapaly ári úzdiksiz jylýmen qamtamasyz etiledi. Jalpy abonentter sany 20 myńdy quraidy, onyń ishinde 120 kópqabatty turǵyn úi jáne 17 áleýmettik, kommertsiialyq jáne ózge de nysandar bar.
