Memleket basshysy Bas prokýror Berik Asylovty qabyldady, dep habarlaidy "Ult aqparat" Aqordaǵa silteme jasap.
Prezidentke elimizdegi zańdylyq pen quqyqtyq tártiptiń jai-kúii, sondai-aq prokýratýra organdarynyń ótken kezeńdegi jumystarynyń qorytyndysy týraly málimet berildi.
Memleket basshysyna «Qańtar oqiǵasy» boiynsha júrgizilip jatqan tergeý amaldary men oǵan qatysqandarǵa raqymshylyq jasaý máseleleri prokýratýranyń erekshe baqylaýynda turǵany baiandaldy.
Qasym-Jomart Toqaevqa qylmystyq salada 1,8 myńnan astam tulǵanyń konstitýtsiialyq quqyǵy qorǵalǵany jóninde aityldy. Prokýrorlardyń narazylyǵy boiynsha 866 úkim joiylyp, ózgertildi. 183 sottalýshynyń jaǵdaiy jaqsartyldy, 20 adam aqtaldy. Biznesti qorǵaý salasynda 145 myń kásipkerdiń quqyǵy qalpyna keltirildi.
Berik Asylovtyń aitýynsha, jer qoinaýyn paidalaný men avtomobil joldary salalarynda júieli zań buzý faktileri anyqtaldy. Indýstriia ministrligi ken óndirýge daiyn turǵan 144 ken ornyn barlaýǵa kelisimsharttar bergen. Budan bólek, jer qoinaýyn paidalanýshylar biýdjetke mindetti 96 milliard teńge tólemegeni anyqtaldy.
Ekonomikalyq resýrstardy zańsyz shoǵyrlandyrýǵa qarsy is-qimyl máseleleri jónindegi komissiia jumysynyń aiasynda memleketke jyljymaityn múlik obektileri, jer ýchaskeleri jáne basqa da múlik qaitaryldy.
Prokýrorlardyń aktilerine sáikes, quny 43 milliard teńgeni quraityn zańsyz berilgen jáne maqsatyna paidalanylmaǵan 7,3 million gektar jer memleketke qaitaryldy. Sonyń ishinde, oligopoliia menshigindegi quny 6 milliard teńge bolatyn 140 myń gektar jer qaitaryldy. Jýyq arada oligopoliia sýbektileriniń menshiginde bolǵan 160 myń gektar jer qaitarylady.
