Indýstriia jáne infraqurylymdyq damý ministrligi avtokólik qurastyrý basqarmasy qyzmetkeri jeńildetilgen avtonesieleý baǵdarlamasyna qansha qarjy bólý josparlanyp otyrǵanyn, bastapqy jarna qansha bolatynyn aitty, - dep habarlaidy Tengrinews.kz tilshisi Kolesa.kz saityna silteme jasap.
IIDM 2027 jylǵa deiin jeńildetilgen avtonesiege 250 milliard teńge bólýdi josparlap otyrǵany aityldy. Memleket biýdjetinen 150 milliard, al "ÓKM Operatory" kádege jaratý tóleminen 100 milliard jumsalady.
"2022 jyly memleket biýdjet tarapynan bastapqyda 30 million teńge bólý kózdelip otyr. Kelesi jyly 45 milliard, 2024 jyly 50 milliard beriledi", - delingen habarlamada.
IIDM avtomobil qurastyrý basqarmasy qyzmetkeri "ÓKM Operatorynyń" qarjysyna bailanysty másele áli sheshilip jatqanyn aitty. Úkimet kádege jaratý tólemi tarapynan aqsha bólý ideiasyn qoldasa, 100 milliard teńgesi halyqtyń osal toptary úshin bastapqy jarnasyz nesiege bólinedi. Biraq 4 paiyzben tek 10 million teńge beriledi.
Sonymen qatar, jeńildetilgen avtonesie úshin de osyndai 10 million degen shekti belgileý josparlanyp otyr. Qymbatyraq kólik satyp alǵysy keletinderge aiyrmashylyqty óz qaltasynan tóleýge týra keledi. Al bankter tutynýshylardan bastapqy jarnany talap etý nemese talap etpeý máselesin ózderi sheshedi.
Vedomstvo ókili kezek týraly aitty. Búginde 15 myńnan asa qazaqstandyq jeńildetilgen avtonesiege kezekte tur.
10 million teńgege deiingi jeńildikpen avtonesieleýdiń jańa baǵdarlamasy boiynsha satyp alýǵa bolatyn avtokólikter tizimi sýrette kórsetilgen.
