«Astana Motors» kompaniiasynyń bas direktory Beknur Nesipbaev biyl shamamen 15-17 myń qazaqstandyq jeńildetilgen avtonesie boiynsha kólik satyp ala alatynyn aitty, dep habarlaidy QazAqparat.
«Aldyn ala boljam boiynsha, biyl jeńildetilgen avtonesiemen 15-17 myń adam kólik satyp alady», - dep jaýap berdi Beknur Nesipbaev baspasóz máslihatynda.
Qazaqstan avtomobil biznesi qaýymdastyǵynyń strategiialyq damý jónindegi direktory Qairat Elamanov jeńildetilgen avtokólik nesielerine qarajy qalai bólinetinine de bailanysty ekenin aitty.
«Munda eki múmkindik bar. Birinshisi qazir júzege asyrylyp jatqan baǵdarlamaǵa uqsas. Iaǵni, búkil nesieni qarjylandyrý nemese ekinshi nusqa – paiyzdyq mólsherlemeni sýbsidiialaý. Sýbsidiialanǵan paiyzdyq mólsherleme tómen bolsa, kólikter sany da kóp bolýy múmkin», - dedi ol.
Qazaqstan avtobiznes qaýymdastyǵynyń vitse-prezidenti Anar Maqasheva jeńildetilgen nesie berý baǵdarlamasynyń tetigin túsindirdi.
«Jeńildetilgen baǵdarlama boiynsha qarajat alýdyń eki nusqasy usynylady. Birinshi nusqany Úkimet jariialady – «ROP Operator» aqshasy osy baǵdarlamaǵa 100 mlrd teńge kóleminde baǵyttalady, ekinshisi – ekinshi deńgeili bankter men QR Damý banki arqyly dástúrli biýdjettik qarajat bólý. Bul biýdjettik nesieleý baǵdarlamasy 2016 jyldan beri jumys istep keledi. Jalpy, Qazaqstan azamattary úshin bazalyq parametrler birdei bolady. Syiaqy mólsherlemesi - jylyna 4%, 5 jylǵa deiin bastapqy jarnasyz, baǵdarlamaǵa Qazaqstanda shyǵarylǵan barlyq kólik qatysady. Avtokóliktiń qunyna emes, nesie somasyna shekteýler bar. Árbir tutynýshynyń ózindik parametrleri bar. Ol kólikti tańdaǵan kezde bank onyń múmkindikterine tiisti esep-qisap jasaidy», - dedi Anar Maqasheva.
