Almatyda qala ákimi Baýyrjan Baibek pen Memlekettik qyzmet isteri jáne sybailas jemqorlyqqa qarsy is-qimyl agenttigi tóraǵasynyń orynbasary Alik Shpekbaevtyń, «Nur Otan» partiiasy ókilderiniń qatysýymen jemqorlyqqa bailanysty jiyn ótti.
Shara barysynda A.Shpekbaev elimizdegi jemqorlyqqa qatysty quqyq buzýshylyqtyń kórsetkishterin jariia etti. Jáne buǵan qosa, keibir kedergilerge qaramastan, Qazaqstanda osy baǵytta júrip jatqan tiimdi sharalardyń nátijesinde ilgerileýler bar ekendigin de atady. «Jemqorlyq tek memleketti ǵana emes, jalpy qoǵamdy tolǵandyrady, bul – elimiz úshin úlken másele. Osy máselede biz álemde 123 oryndamyz, jemqorlyq deńgeii áli de joǵary. Degenmen, jemqorlyqqa qarsy saiasattyń arqasynda biz 2014-2016 jyldary 17 pozitsiiaǵa kóterildik», – dedi A.Shpekbaev.
Sondai-aq, jiyn barysynda sońǵy bir jyl toǵyz ai ishinde 660 laýazym iesi aiyppul tólegeni málim boldy. Sonyń arqasynda ótken jyly biýdjetke 3,5 milliard teńge túsken. Agenttik tóraǵasy orynbasarynyń aitýynsha, aiyppuldy ýaqtyly tólemegender bostandyǵynan aiyrylady. Joǵaryda atalǵan merzim ishinde 924 memlekettik qyzmetkerdiń dúnie-múlki tárkilenip, 1210 adam ómir boiyna memlekettik qyzmetti atqarý quqyǵynan aiyrylǵan.
Memlekettik organdar qyzmetkerlerine profilaktikalyq shara retinde jemqorlyq pen laýazymdy qyzmetin asyra paidalanǵany úshin bas bostandyǵynan aiyrylyp, jazaǵa kesilgender týraly beinerolik kórsetildi. Almatydaǵy barsha derlik quqyq qorǵaý salasynyń basshylary qatysqan úlken jiynda memlekettik apparattyń mańyzdy jumysynyń biri retinde sapaly qyzmet kórsetý máselesi de sóz boldy.
«Biz bul baǵytta barlyq úderisterdi qarapaiymdandyra otyryp, jariialy túrde jumys júrgizýdemiz. Jer qatynastary, páter bólý, qurylys, arhitektýra, bilim men densaýlyq saqtaý salalaryndaǵy barlyq is-qimyldar ashyq júrgizilýde. Laýazymdy adamdarǵa, turǵyndarǵa, bizneske barlyq máselelerdiń tek zań júzinde, eshqandai sybailas jemqorlyqsyz sheshiletinin bildiremiz jáne talap etemiz. Bul iste memleket pen biznes arasynda ózara túsinistik qalyptasýy tiis», – dep atap ótti Almaty ákimi.
B.Baibek qalada retsiz qurylys salýdyń aldyn alý úshin sáýlet-qurylys baqylaý isiniń pármendiligi artqanyn, jer qoryn saqtaý úshin túrli sheshimderdiń Bas josparǵa sai jasalatyndyǵyn aitty. Bul sharalar memlekettik qyzmette jemqorlyqty boldyrmaýǵa yqpal etýde.
Memlekettik qyzmettiń sapasyn arttyrý men qujattardy rásimdeýdi jaqsartý barysynda Almaty búkilálemdik «Doing Business» banki jariialaǵan reitingte alǵa shyqqany da aityldy. Mysaly, biyl Qazaqstan 6 tarmaq boiynsha joǵary kóterilip, 35 oryndy ielendi. Resei, Belgiia, Italiia, Grekiia, Liýksembýrg jáne basqalary bizdiń sońymyzda. Avtomattandyrý arqasynda protsedýralar jeńildetildi, ruqsat qujattaryn berý merzimi 3 ese qysqaryp, 6 kúnge deiin jetti. Kereksiz qujattar talap etilmeitin boldy.
«Salyqtyq ákimshilik te jeńildetildi. Búgingi kúni Almatyda salyqtyq esep berýdiń 96 paiyzy elektrondy túrde jiberiledi, elektrondy salyq qyzmetiniń úlesi – 85 paiyz. Munda qyzmetshilerdiń biliktiligine kóp nárse bailanysty. Memleket basshysy aityp ótkendei, kásibi memlekettik qyzmet meritokratiia qaǵidattaryna negizdelgen. Osy rette bizde óz isin jetik meńgergen apparat qalyptasqan» – dedi jiyn barysynda qala ákimi.
Shahar basshysynyń málimdeýine qaraǵanda, «Qurylys salýǵa ruqsat alý» jaǵdaiy jaqsarǵan kórinedi. Iaǵni, 22 pozitsiiaǵa kóterilip, 56-oryndy ielengen. «Elektrge qosylý» pozitsiiasy 27 orynǵa joǵarylapty. Bul – 102 orynnan 75 orynǵa kóterildi degen sóz.
Jiyn barysynda jemqorlyqtyń aldyn alý jáne jol boiynda politseilermen bailanysty boldyrmaý úshin 2017 jyly qala boiynsha bir myńnan astam beinekameralar ornatylatyn bolady.
Megapolistegi jiyn barysynda sybailastyqpen kúreske qatysty qordalanǵan jaittardyń barlyǵy da ortaǵa salynyp, atqarylyp jatqan jumystardyń barlyǵy da sala-sala boiynsha sóz boldy. Alaida, jemqorlyqpen ymyralasýǵa jol bermeýge qarapaiym halyqtyń ózi de múddeli bolýy kerek. Mundai jaǵdaida qarapaiym turǵyndardyń kórinip turǵan ádiletsizdikke, berilip jatqan paraǵa, jasalynyp jatqan sharalarǵa kóz jumbai, múddelestik tanytýy da bul iste asa mańyzdy ekeni qadap aityldy.
Ainash ESALI,
«Egemen Qazaqstan»
ALMATY
.jpeg)