Qazaqstandaǵy konstitýtsiialyq reforma eldiń saiasi júiesine eleýli ózgerister ákeldi. Ispaniialyq zańger, konstitýtsiialyq quqyq professory Karlos Ýriarte Sanchestiń pikirinshe, 1 shildede kúshine engen jańa Konstitýtsiia memlekettik institýttardyń qurylymyn jańartyp, azamattardyń saiasi protsesterge qatysýyna jańa múmkindikter ashty, dep habarlaidy ult.kz.
Sarapshy negizgi ózgeristerdiń biri retinde burynǵy qos palataly Parlamenttiń ornyna 145 depýtattan turatyn bir palataly Quryltaidyń qurylýyn atady. Sondai-aq ol depýtattardy biryńǵai jalpyulttyq okrýg boiynsha proportsionaldy júiemen sailaý jańa saiasi júieniń erekshelikteriniń biri ekenin aitty.
«Konstitýtsiialyq-quqyqtyq turǵydan alǵanda, bul – aýqymdy ózgeris. Áńgime zań shyǵarýshy organnyń ataýyn nemese qurylymyn ǵana ózgertý týraly emes. Bul parlamenttik modeldi qaita qaraýdy jáne azamattar, saiasi partiialar men zań shyǵarýshy bilik arasyndaǵy jańa ózara qarym-qatynasty qalyptastyrýdy bildiredi», – dedi Karlos Ýriarte Sanches.
Onyń aitýynsha, 23 tamyzda ótken Quryltai sailaýy jańa memlekettik institýttardyń jumysyn bastap, Qazaqstannyń saiasi júiesiniń damýyndaǵy jańa kezeńge jol ashty.
«Ókildi demokratiia tek daýys berýmen shektelmeidi. Azamattardyń qoǵamdyq ómirge qatysýy, óz ustanymynuu bildirýi, saiasi qyzmetpen ainalysýy jáne sailaýǵa óz kandidatýrasyn usynýy da mańyzdy», – dedi ol.
Karlos Ýriarte Sanches qoǵamnyń ártúrli toptarynyń saiasi protsesterge qatysýyna da toqtaldy. Onyń aitýynsha, jańa sailaý júiesinde áielderdiń, jastardyń jáne múgedektigi bar azamattardyń memlekettik institýttardaǵy ókildigin arttyrýǵa baǵyttalǵan tetikter qarastyrylǵan.
Bul Quryltai quramynan da kórinis tapty. 23 tamyzdaǵy sailaý qorytyndysy boiynsha 145 depýtattyń 49-y – áielder.
«Memlekettik institýttardyń qoǵamnyń san alýandyǵyn qanshalyqty kórsete alatyny – olardyń ókildik deńgeiin baǵalaýdaǵy mańyzdy ólshem. Áielder men qoǵamnyń basqa da toptarynyń saiasi protseske qatysýy bul múmkindikterdi keńeitedi», – dedi ispaniialyq zańger.
Sarapshy Qazaqstanda júrip jatqan ózgeristerdi institýtsionaldyq jańǵyrtýdyń jalǵasy retinde qarastyrý qajet dep sanaidy. Onyń pikirinshe, jańa júieniń nátijeliligi azamattardyń saiasi ómirge qatysý múmkindigine, memlekettik institýttardyń ashyqtyǵyna jáne olardyń jumysynda qoǵam múddesiniń qanshalyqty eskeriletinine bailanysty bolady.
