Qazaqstanda memlekettik qyzmetke ornalasý boiynsha konkýrs endi 2 kezeńmen ótkiziledi. Bul týraly "Ult aqparat" Memlekettik qyzmet isteri agenttiginiń baspasóz qyzmetine silteme jasap habarlaidy.
Memleket basshysy qol qoiǵan «Qazaqstan Respýblikasynyń keibir zańnamalyq aktilerine memlekettik qyzmet máseleleri boiynsha ózgerister men tolyqtyrýlar engizý týraly» Qazaqstan Respýblikasynyń Zańy negizinde «Qazaqstan Respýblikasynyń memlekettik qyzmeti týraly» Zańyna túzetýler engizildi.
Engizilgen túzetýlerge sáikes, barlyq memlekettik organdardyń qyzmetkerleri arasynda ótetin ishki konkýrs jalpy konkýrspen biriktirilgen. Ózgerister 2020 jyldyń 17 shildesinen bastap kúshine endi.
Buǵan deiin memlekettik organdar konkýrstardyń úsh túrin júieli túrde ótkizip keldi. Olar: memlekettik organnyń óz qyzmetkerleri arasyndaǵy konkýrs, barlyq memlekettik qyzmetkerler arasyndaǵy konkýrs jáne barlyq azamattar arasyndaǵy jalpy konkýrs.
Óz kezeginde, bul jańashyldyq memlekettik organdardyń bos laýazymdaryn ýaqyt sozbai toltyrýǵa yqpal etedi.
Budan bólek, atalǵan jańashyldyq strategiialyq maqsattarǵa qol jetkizý úshin kadrlyq sheshimder qabyldaýda memlekettik organdardyń utqyrlyǵyn arttyrýǵa septigin tigizedi.
Osynyń aldynda konkýrstardyń úsh túrin ótkizý bos oryndardy toltyrý úshin kóp ýaqytty talap etetin. Bos laýazymdarǵa ornalasý konkýrstarynyń barlyq kezeńderin ótkizý úshin 50 jumys kúnine deiin sozylatyn, al qazirgi ýaqytta bul rásim 15 jumys kúnine deiin qysqartyldy.
Atalǵan tásil júieniń mansaptyq modelin buzbaidy, al oǵan úlken utqyrlyq beredi jáne tutastai alǵanda, jeke sektordan talantty mamandardy tartý protsesin jedeldetýge múmkindik beredi.
Sonymen qatar, memlekettik qyzmetshilerdiń jalpy konkýrstarǵa qatysý tártibi jeńildetildi. Ótken jyldyń qarasha aiynda Zańǵa memlekettik qyzmetkerlerdi jalpy konkýrsqa qatysý kezinde testileýden ótýden bosatatyn túzetýler engizildi.
Osylaisha, memlekettik qyzmetshiler endi jalpy konkýrstarǵa jalpy negizde emes, ishki konkýrsqa uqsas jeńildetilgen tártip boiynsha qatysady. Osyǵan bailanysty, konkýrs kezeńderin qysqartý meritokratiia qaǵidattaryna teris áser etpeidi.
