Ózekti máseleler ashyq dialog, ashyq alań, onlain portal arqyly sheshiletin bolsa – elimizdiń azamattary sergeldeńge túspes edi. Bul týraly Qazaqstan Respýblikasy Parlamenti Májilisiniń depýtaty Baqytbek Smaǵul AntikorLive baǵdarlamasynda aitty, dep habarlaidy QazAqparat.
«Jemqorlyq joiylsa – halyqtyń ál-aýhaty da jaqsarady. Memleket basshysy Halyq únine qulaq asatyn memleketke ún qosý kerektigin aitqan. Qazirgi ýaqytta Ulttyq keńestiń aiasynda kóptegen ministrlikpen tikelei bailanysqa shyǵyp, máselelerdi kóterip jatqan azamattardy bilemiz. Buryn aryz-shaǵym jazǵan kezde kóbinese «Bul suraq bizdiń mekemeniń quziretinde emes» dep jaýap beretin. Mundai jaýap «Halyq únine qulaq asatyn memleket» qaǵidatyna qaishy keledi. Osyndai máseleler ashyq dialog, ashyq alań, onlain portal arqyly sheshiletin bolsa – elimizdiń azamattary munshama sergeldeńge túspes edi», - deidi QR Parlamenti Májilisiniń depýtaty Baqytbek Smaǵul.
Onyń aitýynsha, Táýelsizdik alǵan jyldary Qazaqstan qarýly kúshterinde sybailas jemqorlyqqa qatysty kóp jaǵdai oryn alǵan.
«Qazirgi ýaqytta olardyń bári jazasyn alýda. Al aýǵan soǵysyna keletin bolsam, jaýyngerler patriotizmdi, Otan aldyndaǵy antqa adaldyqty bárinen biik qoiyp otyrdy. Qazaqstandyq jaýyngerlerdiń eshqaisysy qolǵa túsip nemese satqyndyq jasaǵan emes. Ókinishke qarai, kóptegen laýazymdy azamattarymyz qazirgi ýaqytta jemqorlyqpen abaqtyda otyr. Árbir azamat tazalyqty, ardy joǵary qoiyp, qyzmet etse degen oiymyz bar. Jemqorlyqtyń tamyry tereńge jaiylyp ketpes úshin bul týraly otbasydan, mektep qabyrǵasynan bastap aita berý kerek. Indetpen kúresi – biz úshin mindet», - deidi ol.
