Adamzat balasy taǵy bir aýyr kezeńdi bastan keshirip jatyrmyz. Mundai aýyr jaǵdailardy babalarymyz da basynan ótkergen. Biz Jaratýshy Iemizden árdaiym jeńildik, jaqsylyq tileýshimiz. Alaida ómirdiń de óz zańdylyqtary bar. Jaqsylyǵyna shúkir ete bilsek, aýyrlyǵyna sabyr ete bilýge týra keledi.
Mundai qiyn kezeńde ár jeke adam ǵana emes, tutas ult synalady. Qalai tótep beredi? Qalai qorǵana alady? Qalai kúrese alady? Qaitip jeńedi? Bári – syn. Mundai alapat syn jetken jurt súrinbeýi múmkin emes. Álemdegi nebir alpaýyt elderdegi jaǵdai sonyń aiǵaǵy. Tek súringende bir-birimizge súiene bilýimiz kerek. Tabalaspai, jaǵalaspai jaǵaǵa shyǵýǵa tiispiz. Aman-esen jaǵaǵa jetsek, aqyldasa otyryp, ketken kemshilikterimizdi túzeýdiń amalyna kósher edik.
Bul indet sóz joq aiylymyzdy jiǵyzdy. Táýbemizge túsirdi. Isin ońdy júrgize almaityn shendiler men shekten tys daraqylyqqa salynyp, ysyrapqa jol berip kele jatqan jurttyń jaǵa-jeńin túzep, aqshany qaida jumsaýdy, ýaqytty qalai paidalanýdy, balalardy qai baǵytta oqytýdy, bárin-bárin basqasha qarastyrý kerektigi jóninde qazirdiń ózinde úlken oi salýda dep esepteimin. Is basyndaǵy azamattar men qarapaiym qazaǵymnyń ishinde áli de esh oilanbai júrgender bolsa, oǵan árine nalisyń.
Bul indettiń betin júieli jumys, sanaly tártip qana qaitara alatynyn kórip otyrmyz. Dári-dármektiń qoljetimdi bolýyna kedergi keltirgen adamdarǵa qatty renjidim. Ishi ergejeili adamdar. Óz baýyrlarymyz. Elden, eldiń basshysynan uialmai ma eken?
Óz basym halyqtyń qasiretinen qarajat jasaǵan adamdar tóbe kórsetken osyndai qiyn kezeńde Qasym-Jomart Toqaev sekildi qoly taza, biik mádenietti kisiniń Prezident bolyp otyrǵanyna shúkir dedim. «Qaramaisyńdar ma? Uialmaisyńdar ma?» dep aityp otyrǵanym da sondyqtan. Aqyly, ary bar azamattar úlgi alar degen úmittemin.
Osy indettiń qaramaǵyna ilinip baqilyq bolǵan bar adamnyń jaqyndaryna kóńil aitamyn. Qanshama qimasymyz ketti. Jandary jánnatta bolǵai!
Elimiz aman, jurtymyz tynysh bolsyn. Indettiń beti tezirek qaitsa eken dep tileimin. Soǵan barshańyz tártipke baǵynyp, karantin talaptaryn saqtap, at salysyńyz-
dar.
Ákim Tarazi,
jazýshy-dramatýrg, Memlekettik syilyqtyń laýreaty
