Sot úsh jyl buryn páter urlyǵy boiynsha zańsyz sottalyp ketken jigitti aqtap aldy. Bul týraly QR Joǵarǵy sotynyń baspasóz qyzmetiniń basshysy Bolat Kalianbekov aitty, dep habarlaidy "Ult aqparat".
Bolat Kalianbekovtyń jazýynsha, 2015 jyly Dastan Myrzaqulov páterdi tonaý jáne adamdar tobymen aldyn ala sóz bailasyp urlyq jasaý qylmysy boiynsha kináli dep tanylyp, múlki tárkilenip, úsh jarym jylǵa bas bostandyǵynan aiyrylǵan. Alaida kassatsiialyq sot Myrzaqulovty áreketterinde qylmystyq quramnyń bolmaýyna bailanysty aqtap alǵan.
«Kassatsiia kelesi negizderge súienip otyr. Naqtyraq aitqanda, sotqa deiingi tergeý amaldary barysynda Myzaqulovqa psihikalyq jáne fizikalyq turǵyda qysym kórsetilgen. Ekinshiden, tergeý organdarynyń materialdary men aiyptaý qujatynda, sot úkiminde kýágerlerdiń, jábirlenýshi men sottalýshynyń jaýaptaryna kelgende aitarlyqtai aiyrmashylyq bary anyqtalǵan. Osylaisha, Myrzaqulovtyń isti moiyndaǵany týraly jaýabynda qylmys 2015 jyldyń 17 naýryzynda úidiń ekinshi qabatynda bolǵany jazylady. Onyń aitýynsha, altyn buiymdar men aqshany bir qoraptan alyp ketken. Al oqiǵa ornyn tekserý kezindegi hattama men urlyqtyń bolǵany týraly aryzda qylmystyń 2015 jyldyń 16 naýryzynda 8 qabatta tirkelgeni jazylady. Oǵan qosa jábirlenýshiniń túsiniktemesine sáikes qundy zattar men aqsha ártúrli tústegi ártúrli sómkelerde bolǵan», - delingen habarlamada.
Myrzaqulovtyń jaýabyna sáikes ol aqshany teńge kúiinde urlaǵan. Al jábirlenýshi tarap qarajattyń AQSh dollary kúiinde urlaǵanyn jazyp bergen.
«Urlyq jasalǵan jerden 11 adamnyń saýsaq izderi anyqtalǵan. Olardyń bári de sottalýshynyń saýsaq izderimen sáikes kelmegen. Sonymen qatar, sottalýshyǵa quqyǵy men mindettemeleri týraly túsinikteme jumystary júrgizilmegen. Aiyptaý tek sot óndirisiniń tilin bilmegen bir adamnyń ǵana jaýabyna súiene salǵan. Eń qyzyǵy, kúdiktini taný protsesi barysynda álgi kýágerge tek bir adam ǵana kórsetilgen», - dep jazady Kalianbekov óziniń Feisbýk paraqshasynda.
Myrzaqulov qylmystyq isti júrgizip otyrǵan organdardyń zańsyz áreketinen ózine keltirilgen zalaldy óndirýge quqyly.
