Jataqhana janynda otyrǵan almatylyq stýdentter. (Kórneki sýret)
Jańa oqý jylynda keibir JOO-lar jataqhanada turý baǵasyn kúrt qymbattatqan. Kanikýldan oralǵan stýdentterdiń keibiri úilerinen qosymsha qarajat aldyryp jatqandaryn aitady. Al JOO ókilderi stýdentterge «jataqhanalardy jóndeý shyǵyny kóbeigenin» eskertken.
Biylǵy jańa oqý jylynda Almaty men Astanadaǵy keibir joǵary oqý oryndary (JOO) jataqhanalarynda turý baǵasyn qymbattatqan. Bul týraly aqparat bergen stýdentterdiń bári qysymnan qorqyp aty-jónderin jariialamaýdy ótindi.
QazUÝ
Ál-Farabi atyndaǵy Qazaq ulttyq ýniversitetiniń (QazUÝ) aty-jónin jariialamaýdy ótingen stýdenti jazǵy demalystan «jataqhanaǵa jyldaǵydai 30 myń teńgedei tóleimin» degen oimen kelgenin aitady. Biraq ýniversitetke kelgen soń ol jataqhana qunynyń úsh eseden asa qymbattaǵanyn bilip, «ata-anasynan qosymsha aqsha salyp jiberýdi suraǵan».
- Byltyr jataqhanaǵa 28 myń teńge tóledik. Oqý jyly aiaqtalǵanda qosymsha úsh myń teńge taǵy tólegenbiz. Biyl kelsek, [jataqhana baǵasyn] úsh esege ósirip jiberipti. Eki kisilik bólmege [kisi basy jylyna] 95 myń teńgeden (281 dollar), úsh kisilik bólmege - 85 myńnan (250 dollar), tórt kisilik bólmege 75 myń teńgeden (222 dollar) tóleitin bolyp ketken. Biraq jataqhananyń ishi sol qalpy ózgermegen. Jóndeý jumystary jasalmaǵan. Qabyrǵalardy aqtaǵan, basqa ózgeris joq, - deidi QazUÝ stýdenti.
Jataqhananyń turmystyq bólmesinde tamaq ázirlep turǵan stýdent. (Kórneki sýret)
Osy ýniversitettiń aty-jónin jariialamaýdy suraǵan taǵy bir stýdenti jataqhanaǵa 95 myń teńge tólep ornalasqanyn aitty. Ol «jataqhana baǵasy jylda ósetin, biraq birden úsh esege qymbattaidy dep oilamaǵynyn» aitady.
- 1-kýrsqa kelgende 18 myń teńgedei tóledik. Jyl saiyn eki-úsh myń teńge qosylatyn. Biraq biyl jataqhananyń baǵasyn páteraqy siiaqty tólemge kóshirgen. Eki adamdyq bólmege 95 myń teńgeden tóleimiz. Baǵa qymbattasa da jataqhana báribir jetpei jatyr. Jataqhanada turǵysy keletinder kóp. Biraq páterde tursaq, shyǵyn 95 myń teńgeden kóp bolady, - deidi ol.
Pedagogikalyq JOO-lar
Almatydaǵy Abai atyndaǵy Qazaq ulttyq pedagogikalyq ýniversitetiniń esimin jariialamaýdy suraǵan stýdenti de ýniversitet jataqhanasy qymbattaǵanyn aitady.
- Aqyly bólimde oqimyn. Byltyr jataqhanaǵa 40 myń teńge tóledik. Biyl 45 myń teńgege (133 dollar) kóbeidi. Jyl saiyn bes myń qosylyp jatyr. Biraq byltyrǵy jataqhana sol jataqhana. Ishi ózgermegen. Jihazdary da sol kúii. Oryn ala almai júrgenime birneshe kún boldy. Rektorat «oryn bolady, kútińder» degen soń, kúnde jataqhana alý kezegin kútip júrmiz, - deidi ol.
Qazaq memlekettik qyzdar pedagogikalyq ýniversitetiniń stýdentteri de jataqhana baǵasynyń 25 myń teńgeden 30 myń teńgege (88 dollar) kóterilgenin aitty.
EUÝ
Tamaqtanyp otyrǵan stýdentter. (Kórneki sýret)
Al Astanadaǵy Lev Gýmilev atyndaǵy Eýraziia ulttyq ýniversitetiniń aty-jónin aitqysy kelmegen stýdenti segiz adam turatyn bólmege 40 myń teńge (118 dollar) tólegenin aitady.
- Byltyr 35 myń teńge tólegenbiz. Ol kezde de bir bólmede segiz adam turǵan edik. Ázirshe segiz adamdyq bólmede eki adam jatyrmyz. 40 myń teńgeden tóledik. Taǵy adam keletin shyǵar dep oilap otyrmyz, - deidi 2-kýrs stýdenti.
JOO-lar jaýaby
Joǵaryda atalǵan joǵary oqý oryndarynyń basshylyǵy jataqhana baǵasynyń qymbattaýyna qatysty Azattyqqa qandai da bir kommentarii bergisi kelmedi. Azattyq tilshisi QazUÝ men Eýraziia ulttyq ýniversiteti rektoraty men fakýltet basshylyqtaryna birneshe ret habarlasqanymen, naqty jaýap alý múmkin bolmady.
QazUÝ rektoratynda ózin «hatshy» dep tanystyrǵan áiel «jataqhanaǵa jaýapty adamdardyń barlyǵy jańa oqý jyly bastalǵandyqtan qarbalas jumys jasap jatqanyn, olardyń tek qyrkúiektiń 20-syna taman qoldary bosaitynyn» aitty.
Biraq Azattyq tilshisine suhbat bergen osy ýniversitettiń stýdenti «basshylyq jyl saiyn jóndeýge ketetin materialdar qymbattaǵan soń, jataqhana baǵasyn da ósirgenderin aitty» deidi.
Almatydaǵy Abai atyndaǵy QazUPÝ-diń bas ǵimaraty. (Kórneki sýret)
Atalǵan JOO-lar basshylary ishinde Azattyq saýaldaryna jaýap berýge Abai atyndaǵy Qazaq ulttyq pedagogikalyq ýniversitetiniń prorektory Ǵani Turabaev qana beiil tanytqanymen, ol «biz kóp kótermeimiz, kótersek sál ǵana kóteremiz» dep qysqa qaiyrdy.
Statistika komiteti deregi boiynsha, Qazaqstanda 459 myńnan astam stýdent bar. Onyń 358 myńy (70 paiyzy) aqyly bólimde oqidy. Bul elde jańa oqý jyly bastalǵanda stýdentterge jataqhanadaǵy oryndar únemi jetpei jatady. Máselen, Qazaqstandaǵy 15 myńnan astam stýdent oqityn QazUÝ tek alty myńdai stýdentti ǵana jataqhanamen qamtamasyz ete alady. Almaty qalasy ákimdiginiń deregi boiynsha, qaladaǵy 12 ýniversitette jataqhana joq.
Qazaqstan ýniversitetterinde grantta oqityn, ata-anasynan aiyrylǵan jáne kópbalaly otbasydan shyqqan stýdentterge birinshi kezekte jataqhana beriledi. Ondai stýdentter ýniversitetke kópbalaly otbasydan shyqqanyn, ata-anasynan aiyrylǵanyn dáleldeitin anyqtama alyp kelýi kerek. Al aqyly bólimdegi stýdentterge jataqhanadan oryn artylsa ǵana beriledi.
