Oblys ortalyǵynda «Jastar. Pavlodar.kz» taqyrybynda ótken jastar forýmyna halyqaralyq olimpiadalar men shyǵarmashylyq baiqaýlardyń jeńimpazdary, sportshylar, aýyl, qalalarda turatyn belsendi jastar qatysty. Bul shara Táýelsizdiktiń 25 jyldyǵyna arnaldy.
Pavlodar oblysy ákiminiń orynbasary Meiram Begentaev osy forýmda: «Qazir jastardyń áleýmettik problemalaryn sheshýge, olardyń bastamalaryn qoldaýǵa, jumyspen qamtylyp, jumyssyzdyq deńgeiin tómendetýge basa nazar aýdarylyp otyr» dedi.
Qazir óńirdegi joǵary oqý oryndary men kolledjderdiń túlekterine arnalǵan bos jumys oryndary jármeńkeleriniń arqasynda jastardyń 83,6 paiyzy jumyspen qamtylǵan. Ómirlerin aýyl sharýashylyǵy salasyna arnaǵysy kelgen jastar Lebiaji aýdany ortalyǵyndaǵy № 14 agrarlyq-tehnikalyq kolledjde dýaldy oqý júiesi boiynsha bilim alýda. Olar «Rassvet», «Sapa», Jumabek» sharýa qojalyqtarynda tájiribeden ótedi.
«Jumyspen qamtýdyń jol kartasy-2020» baǵdarlamasy boiynsha 20 jas kásipker nesie aldy. Biylǵy jyly paidalanýǵa berilgen 396 páterdiń 270-i jas otbasylarǵa bólindi. Bos jumys oryndarynyń biryńǵai elektrondyq derek qory engiziledi, onda joǵary oqý oryndary men kolledjderdiń túlekteri onlain tártibinde ózine qajet mamandyqty tańdai alady.
Qazir óńirdegi 50-ge jýyq kolledjde 21600, joǵary oqý oryndarynda 15 myń stýdent bilim alýda. Sońǵy jyldary stýdentterge arnalyp jataqhanalar salynýda. Endi taǵy da 2 jataqhana, biri – tústi metallýrgiia kolledjinde, ekinshisi montajdaý kolledjinde boi kótermek. Alǵashqysy ERG kompaniialar tobyna kiretin kásiporyndar esebinen, al ekinshisi «Ortalyq-Aziia otyn-energetika kompaniiasy» AQ esebinen qarjylandyrylady. Joba quny – 612 mln. teńge. Jataqhanalar jospar boiynsha 2017 jyly tapsyrylady. Eki kolledjde 800-dei stýdent jumysshy mamandyqtary boiynsha bilim alýda.
«Serpin» baǵdarlamasy boiynsha oqýǵa kelgen stýdentter Pavlodar aýdanynyń Chernoiarka aýylynda fermerlerge kúzgi ónimdi jinaýǵa kómektesken. Bul – forým barysynda aitylǵan aqparattar.
Sondai-aq, osy joly jasóspirimder arasynda baǵdarlamalardy úilestirýden olimpiada ótip, oǵan 30 oqýshy qatysty. Barlyq jeńimpazdar 2017 jyly mamyr aiynda ótetin halyqaralyq Sátbaev olimpiadasyna joldama aldy. Táýelsizdiktiń 25 jyldyǵyna arnalǵan forýmda atalǵan jeńimpazdardan basqa, halyqaralyq olimpiadalar men shyǵarmashylyq baiqaýlardyń júldegerleri, sportshylar, aýyl, qalalarda turatyn belsendi jastar qatysty dedik. Mysaly, Gonkongte matematikadan ótken halyqaralyq IMO olimpiadasynyń jeńimpazy Ámir Muhammed-Áli, parataekvondodan Eýropa chempiony Karen Ovsepian, mediabapker, «Úzdik bloger» atalymynda «Nur Suńqar» syilyǵynyń iegeri Iakov Fedorov, Kásipker palatasynyń biznes-bapkeri Qýanysh Dosmaǵulov, halyqaralyq Miss Regal International sulýlyq baiqaýynyń laýreaty Ámina Qojanova forýmda syilyq, marapattarǵa ie boldy.
Forýmda memlekettik jastar saiasatynyń 6 baǵyty boiynsha forsait-sessiialar, seminar, treningter ótkizildi. Moderatorlar retinde Parlament Májilisiniń depýtaty Artýr Platonov, Jastar kongresiniń atqarýshy direktory Aidyn Sábitov, «Zerde» jobalar holdinginiń basshysy Qýat Saǵadiev shaqyryldy.
Farida BYQAI,
«Egemen Qazaqstan»
PAVLODAR
.jpeg)