Senat Spikeri Máýlen Áshimbaevtyń tóraǵalyǵymen Palata janyndaǵy Jas sarapshylar klýbynyń kezekti otyrysy ótti. Otyrys barysynda qatysýshylar Memleket basshysynyń Joldaýyndaǵy áleýmettik-ekonomikalyq basymdyqtardy talqylap, olardy iske asyrýǵa arnalǵan usynystaryn ortaǵa saldy. Is-sharaǵa elimizdiń ulttyq ekonomika ministri Álibek Qýantyrov qatysty.
Otyrysty ashqan Senat Tóraǵasy jeke kásipkerlik bastamalardy yntalandyrý, básekelestikti damytý, ulttyq tabysty ádil bólý jáne basqa da strategiialyq bastamalar jańa ekonomikalyq saiasattyń basymdyqtary ekenin aitty.
«Baǵa belgileý isine memlekettiń aralasýynan birtindep bas tartý jáne ekonomikany odan ári monopoliiasyzdandyrý Joldaýda belgilengen birinshi kezektegi mindetter ekeni anyq. Sondai-aq turaqty ekonomikalyq ósýdi qamtamasyz etý úshin túsinikti jáne boljamdy ekonomikalyq saiasat kerek. Prezidentimiz qarjy sektoryn jandandyrý úshin jańa Salyq kodeksin ázirleýdi tapsyrdy. Búginde bul baǵytta tiisti jumystar bastalyp ta ketti. Sonymen qatar Memleket basshysy kedendik ákimshilendirý jáne biýdjettik saiasat salalaryn jaqsartý boiynsha aitarlyqtai reforma júrgizý jáne naqty sharalar qabyldaý qajet ekenin aitty», – dedi Máýlen Áshimbaev.
Senat Tóraǵasy Joldaýda memlekettik-jekemenshik seriktestiktiń jańa modelin engizý jáne nesie resýrstarynyń tapshylyǵyn sheshý arqyly kásipkerlikti júieli túrde qoldaýǵa erekshe nazar aýdarylǵanyn da atap ótti.
Máýlen Áshimbaev Memleket basshysy pandemiianyń shekteýli resýrstar jaǵdaiyndaǵy el ekonomikasyna tigizgen saldaryn eskere otyryp, birqatar negizgi basymdyqty belgilep bergenine nazar aýdardy.
«Bizge qazir aldaǵy jyldarda Qazaqstanda kásipkerlerge jumys isteýge, óz kásibi men biznesin júrgizýge múmkindik beretin naqty erejeler qajet. Bul – ádil, ashyq, demokratiialyq Qazaqstannyń jańa paradigmasyn qalyptastyrýdyń alǵashqy qadamy. Joldaýdan týyndaityn ekinshi mindet – Ulttyq kompaniialar men kvazimemlekettik sektordy jáne ózge de tetikterdi reformalaý arqyly memlekettiń ekonomikadaǵy úlesin azaitý. Taǵy bir basymdyq, biz ekonomikany belsendi túrde nesieleý boiynsha maqsatty qadamdar jasaýymyz qajet. Prezidentimiz basty erejelerdi atap ótti. Endi biz óz usynystarymyzdy berip, olardy negizgi qatysýshy taraptarǵa jetkizýimiz kerek. Sondai-aq ári qarai sol erejelerdi ustanýǵa tiispiz», – dedi Senat Spikeri.
Óz kezeginde ulttyq ekonomika ministri Álibek Qýantyrov ministrliktiń osy baǵyttaǵy jumysyna toqtalyp, elimizdegi jáne álemdegi ekonomikalyq úderisterdi jan-jaqty zerttep, keshendi saraptama júrgizgeni úshin otyrysqa qatysýshylarǵa rizashylyǵyn bildirdi. Sondai-aq ol jańa ideialar jolynda memleket pen sarapshylar qaýymdastyǵynyń birlesip jumys isteýi mańyzdy qadam ekenin tilge tiek etti.
Is-shara barysynda Jas sarapshylar klýbynyń músheleri salyq mólsherlemeleri men basqa da áleýmettik aýdarymdardyń halyqaralyq tájiribesine, qazirgi sanktsiialyq teketires jaǵdaiynda otandyq biznestiń strategiiasyna jáne ekonomikalyq damýdyń basqa da mańyzdy máselelerine qatysty óz usynystary men usynymdaryn aitty.
