Aqsý ferroqorytpa zaýytynyń metall qorytýshysy Aleksandr Shýtov Qazaqstan jastaryn óndiris oryndarynda jumys isteýge shaqyrdy. Onyń aitýynsha, óndiris salasynda eń jarqyn jetistikke jetýdiń úlgisin Prezident óz ómirimen kórsetip otyr, dep habarlaidy QazAqparat tilshisi.
«Men 26 jastamyn. Mamandyǵym - metallýrg. 20 jasymnan bastap Aqsý ferroqorytpa zaýytynda jumys istep kelemin. Qazirgi ýaqytta jumysta master laýazymynda eńbek etemin. Óz jumysymnyń mindettemelerinen bólek, men zaýyttyń qoǵamdyq ómirine belsene aralasyp júrmin. Jastar keńesiniń ǵylymi jumysy boiynsha belsendisimin. Ártúrli ǵylymi-tehnikalyq konferentsiialardan qalmaýǵa tyrysamyn. Sonymen birge, Pavlodar oblysynyń jastar kásipodaǵynyń múshesimin», - dedi jas metallýrg Prezidenttiń qatysýymen ótip jatqan «Táýelsizdik urpaqtary» atty Jastar jylynyń ashylý saltanatynda.
Onyń aitýynsha, zaýyttaǵy metallýrgterdiń kópshiligi - kreativti jastar. Olardyń bári de zamanǵa sai ideialardyń bastamashysy bolyp otyr.
«Bul ideialar óndiristi artyryp qana qoimai, áleýmettik salada da mańyzyn kórsetip keledi. Jastar turmystyq qaldyqtardy óńdeý, aýlalardy jaqsartý, balalarǵa arnalǵan alańdardyń irgesin qalaý sekildi mańyzdy jobalardy júzege asyrýda. Peshte jumys isteý eńbekke degen súiispenshiligimdi týǵyzdy. Kásiporynda jumys istegen ýaqytta memlekettik deńgeidegi ózgeristerge kýá bolǵanymdy aita ketkim keledi», - deidi Aleksandr Shýtov.
Jas metallýrg elimizdiń adal eńbek etip júrgen barsha jastarynyń atynan Memleket basshysyna alǵys aitty.
«Sóz sońynda mamandyq tańdaý aldynda turǵan jastarǵa úndeý tastaǵym keledi. Óndiris - óz áleýetińdi tanytýdyń keremet múmkindigi. Eńbek jolyn óndiriste bastai otyryp, kóp maqsatqa jetýge bolady. Bizdiń Prezident Nursultan Ábishuly osy rette bizge jarqyn úlgi bolyp tabylady», - dep túidi sózin Aleksandr Shýtov.
Aita ketsek, Jastar jylynyń ashylýyna Úkimet músheleri, QR Parlamenti depýtattary, jergilikti atqarýshy organ basshylary, QR Prezidenti janyndaǵy Jastar saiasaty keńesiniń músheleri, «100 jańa esim» baiqaýynyń jeńimpazdary, «Bolashaq» baǵdarlamasynyń túlekteri, jas ǵalymdar qatysýda. Sonymen qatar bul jiynǵa shyǵarmashylyq, stýdenttik jáne jumysshy jastar ókilderi, jas sportshylar, daryndy balalar, zamanaýi media salasynyń ókilderi, balalar úiiniń tárbielenýshileri men túlekteri, jas áskeri qyzmetshiler kelgen.
Eske sala ketsek, QR Prezidenti Nursultan Nazarbaev Qazaqstan halqyna biylǵy Joldaýynda 2019 jyldy Jastar jyly dep jariialaýdy usynǵan bolatyn.
Prezident óz sózinde jastardyń barlyq sanatyn qoldaýǵa arnalǵan sharalardy tolyq qamtityn áleýmettik satynyń aýqymdy platformasyn qalyptastyrý kerektigin aitqan bolatyn Al, arada bir aidan astam ýaqyt ótkende Elbasy Jarlyǵymen 2019 jyl Jastar jyly dep jariialandy.
.jpeg)