Tanymal ánshi Maqpal Júnisova Roza Rymbaeva jáne Naǵima Esqalievamen birge túsken sýretin jariialap, ónerdegi zamandastaryna óleń joldaryn arnady, dep habarlaidy ult.kz.

Óner iesi Threads áleýmettik jelisindegi paraqshasynda qos ánshige degen yqylasyn bildirgen. Ol áriptesterimen bir sahnada óner kórsetýdi ózine buiyrǵan baqyt sanaitynyn jetkizdi.

"Súigizgen, súigen, muńdasqan,

Ómiri óleń, jyr-dastan.

Mende de arman joq shyǵar,

Sizdermen sahnany bir basqan!" – dep jazdy Maqpal Júnisova.

Ánshiniń jyr joldarynan sahnada qatar júrgen jandarǵa degen qurmeti ańǵarylady. Ol ortaq sýretke uzaq túsinikteme bermei-aq, kóńilindegi sezimin tórt jol óleńmen jetkizgen.

Maqpal Júnisova, Roza Rymbaeva jáne Naǵima Esqalieva – qazaq tyńdarmanyna keńinen tanys óner ieleri. Árqaisysy ózindik daýsymen, oryndaý mánerimen sahnadan oryn alǵan ánshilerdiń birge túsken sýreti olardyń shyǵarmashylyq jolyndaǵy syilastyǵyn kórsetedi.

Aita keteiik, Maqpal Júnisova marqum jaryna degen saǵynyshyn jetkizdi.

Maqpal Júnisova kim? 
 

Maqpal Júnisova - qazaq estradasynyń tanymal ánshisi, Qazaqstannyń halyq ártisi, Memlekettik syilyqtyń laýreaty. Ol 1964 jyly 11 qańtarda Qaraǵandy oblysynyń Terekti aýylynda dúniege kelgen. 1994 jyly «Qazaqstannyń halyq ártisi» ataǵyn alyp, 1999 jyly Memlekettik syilyqqa ie bolǵan.

Ánshiniń oryndaýyndaǵy «Aqqý sazy», «Ǵashyq júrek», «Erketaiym», «Jan ana», «Kózderińe ǵashyqpyn» sekildi ánder tyńdarmanǵa keńinen tanys. Onyń repertýarynda mahabbat, anaǵa qurmet pen saǵynysh taqyrybyndaǵy lirikalyq shyǵarmalar kóp.