Qazaqstanda jappai ereýilder kezinde biznesine zalal kelgen kásipkerlerge memlekettik tólemaqynyń qashan berile bastaityny belgili boldy, dep habarlaidy QazAqparat.
«Osy aptada barlyq óńirdegi palatanyń keńes jiyny ótedi. Ol jiynda 2 másele qarastyrylady. Birinshi, Atamekenniń bolashaq damýyna qatysty usynystar. Ekinshi, kásipkerlerdiń óz suraqtary, biznesti qalai damytamyz, kásipkerlerdiń Úkimetke qandai usynys, suraqtary bar. 17 óńirde keńes ótken soń, jumys toby qurylady. Oǵan elimizdiń ár óńirinen 2 adamnan sailanady. Odan bólek, jumys tobyna qatysam degen sala mamandary men sarapshylar bolsa esik ashyq. Atalǵan jumys toby 1-1,5 ai boiy otandyq kásipkerlikti ilgeriletý ulttyq palatanyń jumysyn jetildirý jolyn izdeidi. Jáne olardyń jumysy áleýmettik jeli arqyly ashyq jariia etiledi», - dedi «Atameken» ulttyq kásipkerler palatasynyń basqarma tóraǵasy Abylai Myrzahmetov Facebook paraqshasyndaǵy tikelei efir barysynda.
Onyń aitýynsha, Qazaqstanda kásipkerlikti damytýǵa arnalǵan usynystar palatanyń kezekti sezinde qaralady.
«Qańtar oqiǵasy kezinde kásipkerlikke aitarlyqtai zalal keldi. 1700-ge jýyq kásipkerlik nysan qirady, onyń 92 paiyzy Almaty qalasyna tiesili. Óz kezegimizde jedel jeli quryp, kásipkerlermen bailanysty bolyp, shuǵyl aqparat alyp otyrdyq. Bizdiń koll-ortalyqqa 10 myńnan astam aqparat kelip tústi. Onyń bárin Úkimetke tikelei jetkizip otyrdyq. Sondai-aq, biz Úkimetke bizneske kelgen shyǵyndy óteý jolyna qatysty naqty usynys berdik. Ol usynystardy Úkimet janynan qurylǵan arnaiy komissiia qarap, bekitti. Jappai tártipsizdikter kezinde biznesine zalal kelgen jandar infokazakhstan.kz saity arqyly ótinish qaldyra alady. Búginde sait arqyly 195 ótinish kelip tústi, onyń 88 paiyzy Almatydan. Kásipkerlerdiń ótinishin qalalyq komissiia qarap jatyr. Sondyqtan aldaǵy 1 aidyń ishinde kásibine ziian kelgen jandar tólemaqy ala bastaidy degen senimdemiz», - deidi ol.
