Japoniia juma kúni el úkimetiniń Tokio qalasynda ótetin Olimpiada oiyndarynyń koronavirýsqa bailanysty keiinge qaldyrylyp, olardy 2032 jyly ótkizýge tyrysyp jatqany týraly sheshim qabyldady degen jańalyqty joqqa shyǵardy, dep habarlaidy KYODO NEWS agenttigi.
Buǵan deiin britandyq The Times basylymy Japoniia úkimetindegi derekkózge silteme jasap, el úkimetiniń Tokiodaǵy Olimpiada oiyndaryn koronavirýsqa bailanysty keiinge qaldyrý kerek degen qorytyndyǵa kelgenin habarlaǵan bolatyn.
«Biz bul jańalyqty tolyqtai joqqa shyǵaramyz», - dep málimdedi Japoniia ministrler kabineti Bas hatshysynyń orynbasary Manabý Sakai kezekti baspasóz máslihaty kezinde.
Beisenbide Halyqaralyq Olimpiada komitetiniń basshysy Tomas Bah KYODO NEWS agenttigine bergen onlain-suhbatynda: «Qazirgi kezde 23 shilde kúni Tokiodaǵy Olimpida oiyndary ashylmaidy dep sanaýǵa esh negiz joq», - atap ótti.
HOK men Japoniia úkimetiniń Olimpiada oiyndaryn biyl ótkizýge niettenip otyrǵanyna qaramastan, virýstyń taralýyna bailanysty eldegi jaǵdai ýshyǵyp jatyr.
Eske sala ketsek, Japoniiada Olimpiada oiyndary 2020 jyldyń jazynda ótýi tiis bolǵan, alaida koronavirýsqa bailanysty biylǵy jyldyń jazyna aýystyryldy. Jarystardyń 2021 jyldyń 23 shildesi men 8 tamyzy aralyǵynda ótýi kútilýde.
