Elbasynyń Joldaýymen tanysyp shyqtym. Oryndy da retti biraz nárse aitylǵan. Tsifrlyq ekonomika, jańa tehnologiialar, shaǵyn biznesti damytý, terrorizm jáne jemqorlyqpen kúres jáne taǵysyn taǵy. Ondai igi maqsattarǵa qalai qarsy bolasyń?
Biraq birneshe suraq týady.
2017-jyly alǵa qoiyp otyrǵan biraz máseleni baiaǵyda-aq sheship tastaýǵa bolatyn edi ǵoi. Ol úshin prezidenttiń jyl saiynǵy Joldaýynyń oryndalýy týraly parlament pen úkimettiń esebi jariialanyp turatyn, oǵan halyq baǵa beretin dástúr qalyptasýy kerek! Olai bolmasa, baiaǵy joldaý sol joldaý bop qala beredi. Nege osy kúnge deiin osyndai júie engizilmegen? Menińshe, sheneýnikter naqty jaýapkershilikten qashyp otyr!
Ekinshi jait Qazaqstanǵa kóshiriletin qytai kásiporyndaryna qatysty. Áli kúnge deiin olardyń tolyq tizimi, bizge kelýiniń naqty sharttary, ásirese, jumys kúshi men qarjylyq negizderi, ekologiialyq standarttarǵa sáikestigi jaiynda eshnárse aitylmaidy. Qoǵamda qalyptasyp kele jatqan narazylyqty odan saiyn órshitpeý úshin ol saýaldarǵa búginniń ózinde jaýap berý kerek!
Tsifrlyq ekonomika týraly kóp aitylǵan. Árine, ol zaman talaby. Biraq másele tek ony formaldy túrde engizýge ǵana tirelmeidi ǵoi, onyń basqa da, tereńirek astarlary bar. Máselen, sonyń áserinen qysqartylyp qalatyn jumys oryndary men joiylýǵa tiis tutas salalar men kásiporyndardyń naqty taǵdyry ne bolmaq? Eń basty másele mynada – tsifrlyq ekonomika eski, jemqorlyqqa dańǵyl jol ashatyn zańdar boiynsha jumys istei bere me?
Bilim berý salasynda orys tiliniń ornyna aǵylshyn tili kóbirek aitylypty. Oǵan da shúkir. Biraq, ol tildiń de mártebesi qazaq tiliniń esebinen óspeýi tiis!
Mindetti meditsinalyq saqtandyrý júiesinde resmi jáne beiresmi túrdegi jumyssyzdar qalai densaýlyǵyn saqtamaq?
Zeinetaqy 20 paiyzǵa kóbeitilmek, al baǵanyń ósýin kim qadaǵalamaq? Jáne de zeinetaqymen birge nege muǵalimder men dárigerlerdiń jalaqysy, stýdentterdiń stipendiiasy nege kóterilmeidi?
Menshik quqyn qorǵaýdy kúsheitý talaby keshe ǵana Konstitýtsiiaǵa engizilýge usynylyp otyrǵan shetel azamattarynyń Qazaqstandaǵy menshigin qorǵaýǵa ulasyp ketpei me? Jáne ol qadam memleket qaýipsizdigine qandai áser etpek?
Joldaýǵa qarasaq, eldegi turaqtylyqty buza alatyn tek qana dini terrorizm eken. Al jer-jerde bolyp jatqan ártúrli keseldi jaǵdailarǵa qatysty qoǵamdyq narazylyqtyń órshýi, onyń potentsialy týraly aitylmaǵan. Menińshe, ol durys emes: bilik qisyq zańdar men kesirli sheneýnikterdiń teris áserlerinen bolyp jatqan dúmpý-dúmpý narazylyqty boldyrmaý jaiynda naqty baǵdarlama jasaqtaýy tiis! Jáne de ol óz halqymen, azamattyq qoǵammen tolyqqandy dialog ornatýdan bastalýy tiis!
Úkimet pen UQK-ne «Qazaqstan kiberqalqany» atty baǵdarlamany ázirleý tapsyrylypty. Kiberqylmyspen kúresemiz dep Internettegi balama pikir ielerin qýdalaý, olardy jelide ańdyp-qadaǵalaýdy qolǵa almai ma degen de saýaldar joq emes.
Eń bastysy – bul Joldaýda bári bar da, «saiasi reforma» degen bir aýyz sóz joq! Ras, osydan bes kún buryn elbasynyń ózi «bilik tarmaqtarynyń ókilettikterin qaita bólý týraly» usynys jasap, qalǵyp-múlgip jatqan qoǵamdyq oidy bir serpiltip tastap edi.
Endigi jerde «ózi aitqan saiasi ózgerister týraly talap Joldaýǵa enbegen soń, odan ne qadir?» degen suraq ta paida bolyp jatyr...
Ámirjan Qosanov
