Jańartylatyn energetikany damytý úshin qolaily jaǵdai jasalady. Bul qadamdar búgin Senattyń jalpy otyrysynda qabyldanǵan «Qazaqstan Respýblikasynyń keibir zańnamalyq aktilerine jańartylatyn energiia kózderin paidalanýdy qoldaý jáne elektr energetikasy máseleleri boiynsha ózgerister men tolyqtyrýlar engizý týraly» Zańynda qamtylǵan, dep habarlaidy "Ult aqparat".
Zań jobasy Parlament depýtattarynyń bastamashylyǵymen ázirlendi.
«Jańartylatyn energetikany damytý úshin qolaily jaǵdailar jasaý kózdelgen. Bul maqsatta usynylyp otyrǵan sharalardyń qatarynda Jańartylatyn energiia kózderiniń elektr energiiasyn satyp alýǵa arnalǵan kelisimsharttyń qoldanylý merzimin 15 jyldan 20 jylǵa deiin ulǵaitý usynylady. Ol investorǵa aýktsiondyq saýda-sattyqta neǵurlym tómen tarifterdi usynýǵa jaǵdai jasaidy. Bul óz kezeginde tutynýshylardyń shyǵyndaryn tómendetýge múmkindik beredi», - dedi qujat boiynsha baiandama jasaǵan Parlament Májilisiniń depýtaty Shavhat Ótemisov.
Sonymen qatar, zań jobasynda jańartylatyn energiia kózderi jobalary aldyndaǵy tólemder boiynsha óz mindettesin oryndamaǵan jaǵdaida, Úkimet tarapynan qarjy-esep aiyrysý ortalyǵyna kómek kórsetý týraly norma engizilgen.
Onyń aitýynsha, kelesi tujyrymdamalyq usynys qarjy-esep aiyrysý ortalyǵy arqyly tasqyndyq elektr energiiasyn ortalyqtandyrylǵan satyp alý-satýdy endirýge arnalǵan.
«Qoldanystaǵy «Elektr energetikasy týraly» Zańǵa sáikes, gidroelektrstansalar tabiǵatty qorǵaý úshin sý jiberý kezeńinde óndiriletin elektr qýatyn ortalyqtandyrylǵan saýda-sattyqta satýǵa mindetti. Bul rette, tasqyndyq elektr energiiasy baǵasyn memleket rettemeitin treiderler satyp alady. Júielik operatordyń derekteri boiynsha kóktemgi sý tasqyny kezindegi sý tasqyny elektr energiiasynyń jyl saiynǵy kólemi orta eseppen 300 mln kVt/s quraidy. Ortalyqtandyrylǵan saýda-sattyqta treiderler 1 kVt/saǵ úshin 2-3 teńge sheginde tasqyn elektr energiiasyn satyp alady jáne eki-úsh ese qymbat satady», - dedi Sh. Ótemisov.
Osyǵan bailanysty, gidroelektrstansalardyń tasqyndyq elektr energiiasyn «KEGOK» kompaniiasyna qaraityn qarjy-esep ortalyǵyna satý mindetin zańnamalyq túrde bekitý usynyldy. Ol óz kezeginde osy qymbat emes tasqyndyq elektr energiiasyn eldiń barlyq tutynýshylary arasynda bóledi.
«Zań jobasy manevrlik qýattar kólemin jáne jańartylatyn energiia kózderiniń úlesin ulǵaitý úshin qolaily jaǵdai jasaýǵa múmkindik beredi degen oidamyz», - dedi Májilis depýtaty.
